كوپشىلىككە قارىز بولىپ قالعانىن ايتىپ پوليسياعا ءوز اياعىمەن بارعان.
قاراعاندىدا تۇرعىندارعا جالعان تۋر ساتقان فيرما ديرەكتورى 3 جىلعا سوتتالدى. 28 جاستاعى ولگا پوجەماتكينا شەتەلگە دەمالۋعا بارماق بولعانداردىڭ 11 ميلليون تەڭگەسىن جيناپ، قايتارماعان، تۋردى دا ۇيىمداستىرماعان، دەپ حابارلايدى Almaty-akshamy.kz.
"پوجەماتكينا ولگا اناتوليەۆنا ق ر قك 190-بابى، 3-تارماعىنىڭ. - 1 جانە 3-پۋنكىنە سايكەس كىنالى دەپ تانىلىپ، ءۇش جىل باس بوستاندىعىنان ايىرۋ جازاسى بەلگىلەندى. جازاسىن ورتاشا ءقاۋىپسىز رەجيمدەگى مەكەمەدە وتەيدى. وسىعان دەيىن ءۇيقاماقتا بولعان ول سوت زالىندا ۇستالىپ قاماۋعا الىنسىن"، – دەدى سۋديا ايگۇل مىرزابەكوۆا.
كتك تەلەارناسىنىڭ حابارلاۋىنشا، تەرگەۋ كەزىندە ءۇيقاماقتا وتىرعان ولگا پوجەماتكيناعا بۇل ۇكىمدى ەستىگەندە ەسەڭگىرەپ قالعان. ويتكەنى ول ءىس قوزعالا باستاعاندا كۇيەۋىمەن اجىراسىپ، جالعىزباستى انا ستاتۋسىن العان. ەمىزۋلى بالاسى دا بار.
كوپشىلىككە قارىز بولىپ قالعانىن ايتىپ، پوليسياعا ءوز اياعىمەن بارعان. سوندىقتان ءىس ازاماتتىق سوتقا اۋىسىپ، ءارى كەتسە، شارتتى جازا بولادى دەپ ۇمىتتەنگەن. الايدا سوت تەرگەۋى ونىڭ الاياقتىقتى قاساقانا جاساعانىن دالەلدەدى. سول سەبەپتى ءوزىن قاماۋعا الىنسىن، ال بالاسىنىڭ تاعدىرىن قامقورشىلىق ورگاندارى شەشسىن دەگەن ۇكىم كەستى. الدانىپ قالعان تۋريستەردىڭ اقشاسىن قايتارۋعا دا مىندەتتەلدى. دەگەنمەن، زارداپ شەككەندەر قاراجاتىنا جىلدام قول جەتكىزەتىنىنە سەنبەيدى.
"شىعىنىمىز 2 ميلليون 580 مىڭ تەڭگە. وتباسىم – ءۇش بالام، جولداسىم، بەس ادامبىز، تۇركياعا بارامىز دەپ ۇمىتتەنگەنبىز. مەنىڭ ويىمشا، ءبىزدىڭ قاتەلىگىمىز – فيرمانىڭ قۇجاتتارىن تەكسەرمەدىك"، - دەيدى ايسۇلۋ بەكجىگىتوۆا.