2024 جىلدان باستاپ 5G وبلىس ورتالىقتارىنا ەنگىزىلە باستايدى.
جىل سوڭىنا دەيىن رەسپۋبليكالىق ماڭىزى بار قالالار 15 پايىزعا 5G ينتەرنەتىمەن قامتىلادى دەپ كۇتىلۋدە. بۇل تۋرالى ق ر سيفرلىق دامۋ مينيسترلىگىنىڭ تەلەكوممۋنيكاسيا كوميتەتىنىڭ ءتوراعاسى ەرجان مەيراموۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«5G ەنگىزۋ رەسپۋبليكالىق ماڭىزى بار ءۇش قالادا (استانا، الماتى، شىمكەنت) پيلوتتىق رەجيمدە ءجۇرىپ جاتىر. وتكەن جىلدىڭ جەلتوقسانىندا 5G راديوجيىلىكتەرىنە اۋكسيون ۇيىمداستىرىلدى. سونىمەن قاتار بايلانىس وپەراتورلارىنا ليسەنزيالىق مىندەتتەر جۇكتەلدى. وعان سايكەس، بيىل جىل سوڭىنا دەيىن استانا، الماتى جانە شىمكەنت قالاسى 15% 5G ينتەرنەتپەن قامتىلۋى ءتيىس. ال 2027 جىلعا قاراي اتالعان قالالاردىڭ 75% 5G ەنگىزىلەدى. سول سياقتى 2024 جىلدان باستاپ 5G وبلىس ورتالىقتارىنا ەنگىزىلە باستايدى»، - دەدى ەرجان مەيراموۆ اتالعان مينيسترلىكتىڭ كەڭەيتىلگەن القا وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرە تۇرىپ.
ايتا كەتسەك، ۇكىمەت باسشىسى ەلىمىزدە 5G ەنگىزۋدى 2027 جىلعا دەيىن اياقتاۋدى تاپسىرعان ەدى.
«مينيسترلىك ۇيالى بايلانىس پەن ينتەرنەتتىڭ ساپاسىنا تالداۋ جۇرگىزۋى قاجەت. سونىڭ نەگىزىندە ءتيىستى ءىس-شارالار ازىرلەنىپ، ول «قولجەتىمدى ينتەرنەت» ۇلتتىق جوباسى شەڭبەرىندە قابىلدانۋى ءتيىس. بۇگىندە ەلىمىزدە 5G ۇيالى بايلانىسىن ەنگىزۋ جۇمىستارى ءجۇرىپ جاتىر. ءبىرىنشى كەزەكتە رەسپۋبليكالىق ماڭىزى بار قالالار مەن وبلىس ورتالىقتارىن قامتۋ جوسپارلانىپ وتىر. اتالعان جۇمىس 2027 جىلى اياقتالۋى كەرەك»، - دەگەن مىندەت جۇكتەدى ءاليحان سمايىلوۆ.
ەسكە سالايىق، بىلتىر جەلتوقساندا ەلىمىزدە العاش رەت 5G ءۇشىن راديوجيىلىكتەرگە اشىق اۋكسيون وتكەن ەدى.