لوندوندا الەمگە ايگىلى ءاپالى-سىڭلىلى ناقىپبەكوۆالار تۋرالى دەرەكتى ءفيلمنىڭ تۇساۋكەسەرى بولىپ ءوتتى.
كوركەم تۋىندى كلاسسيكالىق ونەردىڭ قاس شەبەرلەرى، قازاقتىڭ مۋزىكانت قىزدارىنىڭ تاعدىرى تۋرالى سىر شەرتەدى. ەلۆيرا، ەلەونورا جانە الفيا ناقىپبەكوۆالار - الەمدەگى ەڭ ۇزدىك فورتەپيانولىق تريولاردىڭ ءبىرى، دەپ حابارلايدى Almaty-akshamy.kz Qazaqstan.tv-عا سىلتەمە جاساپ.
ولار سوۆەتتىك قازاقستاندا، قاراعاندىدا تۋىلىپ، مۋزىكالىق ءبىلىم العان. ماسكەۋدە كونسەرۆاتوريادا وقىپ، حالىقارالىق بايقاۋلاردا ۇزدىك دەپ تانىلعان. شىعارماشىلىق ەركىندىك اڭساعان ءۇش قىز باتىستى باعىندىرۋ ءۇشىن ەلدەن كەتىپ قالادى. سەكسەنىنشى جىلداردىڭ سوڭىندا لوندوندا باستارى بىرىگەدى. بۇگىندە شەتەلدە «بەكوۆالار تريوسى» دەگەن اتپەن تانىمال. فيلمدە ۆيرتۋوزداردىڭ وسى ءومىر جولى تۋرالى باياندالادى.
«ادامداردىڭ ءومىرىن قىسقا دەرەكتى فيلمدە كورسەتۋ جانە وتكەن تاريحقا تەرەڭ ۇڭىلە ءبىلۋ وتە قيىن. بۇل تۇرعىدا تۋىندى ءساتتى شىقتى دەپ ويلايمىن. رەجيسسەر مەن شىعارماشىلىق توپتىڭ ەڭبەگى وراسان»، - دەيدى مۋزىكانت الفيا ناقىپبەكوۆا.
«ەندى ءومىر دەگەن ۇزاق ەمەس قوي. ءبىراز جاسقا كەلىپ جاتىرمىز ءبارىمىز دە. مۇنى تاريحقا كىرگىزۋ ءۇشىن، ەرتەڭ وكىنىپ قالماۋ ءۇشىن بۇنى بۇگىن ەمەس ەرتەڭ ءبارىمىز باعالايمىز. سونداي ويمەن وسى ءفيلمدى قۇردىق»، - دەيدى «بەكوۆالار: ەركىندىككە جول» دەرەكتى ءفيلمنىڭ پروديۋسەرى بەرلين يريشيەۆ.