بيبىگۇل تولەگەنوۆانىڭ ءحىى حالىقارالىق ۆوكاليستەر كونكۋرسىنىڭ جەڭىمپازدارى انىقتالدى
17 قىركۇيەك كۇنى الماتىدا اباي اتىنداعى قازاق ۇلتتىق وپەرا جانە بالەت تەاترىندا بيبىگۇل تولەگەنوۆانىڭ ءحىى حالىقارالىق ۆوكاليستەر كونكۋرسىنىڭ لاۋرەاتتارىنىڭ قاتىسۋىمەن گالا-كونسەرت ءوتتى.
ماراپاتتاۋ كەشىنە ق ر مادەنيەت جانە اقپارات مينيسترلىگىنىڭ جانە الماتى اكىمدىگىنىڭ وكىلدەرى مەن بيبىگۇل تولەگەنوۆانىڭ ءحىى حالىقارالىق ۆوكاليستەر كونكۋرسىنىڭ قازىلار القاسى قاتىستى. كونكۋرستىڭ الەۋمەتتىك سەرىكتەسى - «Samruk-Kazyna Trust» الەۋمەتتىك جوبالاردى دامىتۋ قورى.
كەشتە كونكۋرسقا قاتىسقاندار ىشىندە ارنايى سىيلىق يەگەرلەرى مەن گران-پري جەڭىمپازدىڭ ەسىمى انىقتالدى. سونىمەن بيىلعى ناتيجە بويىنشا ءازىربايجان استاناسى – باكۋدەن كەلگەن ماحير تاگيزادە بيبىگۇل تولەگەنوۆانىڭ ءحىى حالىقارالىق ۆوكاليستەر كونكۋرسىنىڭ جەڭىمپازى اتاندى.
1 پرەميا جانە لاۋرەات اتانعاندار:
ازيزا وماروۆا – استانا، قازاقستان
ابىلاي بەكەن – استانا، قازاقستان
2 پرەميا جانە لاۋرەات اتانعاندار:
نۇرعالىم امانباي – الماتى، قازاقستان
اتاش كارايەۆ – باكۋ، ءازىربايجان
ليانسزە حاو – سزىبو، جۇڭگو
3 پرەميا جانە لاۋرەات اتانعاندار:
اياجان قۋانىشالييەۆا – الماتى، قازاقستان
ديار نۇرسۇلتانوۆ – الماتى، قازاقستان
ماقسات ساماتوۆ – الماتى، قازاقستان
گالينا سولاكيان – ەريەۆان، ارمەنيا
قازاقستان كومپوزيتورلارىنىڭ تۋىندىسىن شەبەر ورىنداعانى ءۇشىن ماراپاتتالعاندار:
ماحير تاگيزادە - باكۋ، ءازىربايجان
ارنايى سىيلىق يەگەرلەرى:
بيبىگۇل تولەگەنوۆانىڭ رەپەرتۋارىنان قازاقستان كومپوزيتورلارىنىڭ اندەرىن ۇزدىك ورىنداعانى ءۇشىن ماراپاتتالعاندار:
ايبەك حايرۋللا (استانا، قازاقستان)
ماريامگۇل تولەگەنوۆا اتىنداعى «ءۇمىت» سىيلىعىن يەلەنگەندەر:
جويان يۋ (جۇڭگو)
كونكۋرستىڭ ۇزدىك كونسەرتمەيستەرى اتانعاندار:
ۆيكتوريا يۆانوۆا – رەسەي
ءزارۋ جازىقبايەۆا – قازاقستان
كونكۋرستىڭ قازىلار القاسىنىڭ ءتورايىمى، كسرو جانە قازاقستاننىڭ حالىق ءارتىسى، سوسياليستىك ەڭبەك ەرى، كسرو جانە قازاقستاننىڭ مەملەكەتتىك سىيلىقتارىنىڭ يەگەرى، اكادەميك، قازاق كلاسسيكالىق ونەرىنىڭ بۇلب ۇلى بيبىگۇل تولەگەنوۆا ارنايى قۇتتىقتاۋ ءسوزىن ارنادى:
«ءبىزدىڭ ۆوكالدىق كونكۋرستىڭ بارلىق قاتىسۋشىلارىن، جاس تالانتتى ورىنداۋشىلاردى شىن جۇرەكتەن قۇتتىقتاي وتىرىپ، وسى بايقاۋعا قولداۋ بىلدىرگەن ق ر مادەنيەت جانە اقپارات مينيسترلىگىنە جانە مينيستر ا.بالايەۆاعا، الماتى اكىمدىگىنە، «Samruk-Kazyna Trust» الەۋمەتتىك جوبالاردى دامىتۋ قورىنا، اباي اتىنداعى قازاق ۇلتتىق وپەرا جانە بالەت تەاترىنا جانە ءبىزدىڭ بارلىق دەمەۋشىلەرىمىزگە العىس بىلدىرەمىن. ولاردىڭ قولداۋىنىڭ ارقاسىندا كونكۋرس ويداعىداي ءوتتى. بيبىگۇل تولەگەنوۆانىڭ حالىقارالىق ۆوكاليستەر كونكۋرسى بيبىگۇل تولەگەنوۆانىڭ جەكە كونكۋرسى ەمەس، بۇل قازاقستان تۋرالى، ەل مادەنيەتىنىڭ يگىلىگى. كونكۋرس ەڭ الدىمەن قازاقستاننىڭ اتىن شىعاراتىن جوبا. ءبىز تەك مۇنايمەن، گاز، ۋران جانە بيدايىمىزبەن عانا باي ەمەسپىز، ءبىز مادەنيەتىمىزبەن، جوعارى دەڭگەيدەگى كلاسسيكالىق ونەرىمىزبەن دە بايمىز. بۇل بايقاۋ ورتالىق ازيا ەلدەرىندەگى كلاسسيكالىق ونەردەگى جالعىز جوبا بولعاندىقتان ءبىزدىڭ كونكۋرسقا قاتىسۋ ءۇشىن الىس جانە جاقىن شەتەلدەردەن كوپتەگەن تالانت يەلەرى كەلىپ، كاسىبي وپەرا جانە كونسەرتتىك كامەرالىق انشىلەر جينالادى. بۇل ءبىز ءۇشىن جەتىستىك، قۋانىش. بيىلعى كونكۋرس ادەتتەگىدەي جوعارى دەڭگەيدە ءوتتى. كونكۋرستا جاڭا ەسىمدەر اتالدى، كلاسسيكالىق ونەردىڭ جاس قارلىعاشتارى قاناتتارىن قاقتى جانە ولار بيبىگۇل تولەگەنوۆانىڭ حالىقارالىق ۆوكاليستەر كونكۋرستىنىڭ لاۋرەاتتارى اتانادى. بۇل دەگەنىمىز قازاقستاننىڭ ماقتانىشى. ءدال وسى كونكۋرستىڭ لاۋرەاتتارى الەمدىك ساحناعا شىعىپ، قازاقستاننان شىققان انشىلەر ەلىمىزدىڭ اتىن شىعارادى».
بيبىگۇل تولەگەنوۆانىڭ ءحىى حالىقارالىق ۆوكاليستەر كونكۋرسىنىڭ جەڭىمپازى ماحير تاگيزادە جۋرناليستەرگە بەرگەن سۇحباتىندا: «قۋانىشىم قوينىما سىيماي تۇر، بۇل كونكۋرسقا ءۇش رەت قاتىسقىم كەلسە دە بىردە ءبىر جول تۇسپەگەن ەدى. ەندى مىنە، قاتىسىپ، جەڭىمپاز اتاندىم. مەن ءوز ەلىمدەگى جانە باسقا دا كوپتەگەن حالىقارالىق كونكۋرستارعا قاتىسقانمىن. بۇل جولى الماتىدا، قازاقستاندا، بيبىگۇل احمەت قىزىنىڭ وتانىندا وتكەن بايقاۋعا قاتىسقانىما وتە قۋانىشتىمىن. قازاقستاندى ەكىنشى ءۇيىم دەپ سانايمىن. كونكۋرس تالابى بويىنشا ءبىز قازاق رومانسىن ورىندادىق، ودان وزگە ءوزىمنىڭ جەكە قالاۋىم بويىنشا فينالدا «اباي» وپەراسىنان اريا ورىندادىم. قازاقتىڭ كلاسسيكالىق مۋزىكاسىن ورىنداۋ جانىما راحات سىيلايدى».
گالا-كونسەرتتە اباي اتىنداعى قازاق ۇلتتىق وپەرا جانە بالەت تەاترىنىڭ سيمفونيالىق وركەسترىنىڭ سۇيەمەلدەۋىمەن (ديريجەرى ە.احمەدياروۆ) كونكۋرس لاۋرەاتتارى ەڭ تانىمال قازاق جانە شەتەلدىك كلاسسيكالىق اندەردى ورىنداپ، تىڭدارماننىڭ قۇلاق قۇرىشىن قاندىردى.
ايتا كەتەيىك، بيبىگۇل تولەگەنوۆانىڭ حالىقارالىق ۆوكاليستەر كونكۋرسى 2001 جىلدان بەرى ءار ەكى جىل سايىن وتكىزىلىپ تۇرادى. بيىل اباي اتىنداعى قازاق ۇلتتىق وپەرا جانە بالەت تەاترىنىڭ مەرەيتويلىق 90-اشىلۋ ماۋسىمىنىڭ اياسىندا وتكىزىلدى.
بيىل ون ەكىنشى رەت وتكىزىلىپ وتىرعان كونكۋرسقا 70-تەن استام ءوتىنىش كەلىپ، ونىڭ 66-سى قاتىستى. ياعني الەمنىڭ 11 ەلىنەن جاس تالانتتار باقتارىن سىنادى. قازاقستاننىڭ، رەسەي، قحر، چەحيا، ليۋكسەمبۋرگ، يتاليادان الەمدىك وپەرا ونەرىنىڭ مايتالماندارىنان تۇراتىن جوعارى دەڭگەيدەگى كاسىبي حالىقارالىق قازىلار القاسى قاتىسۋشىلاردىڭ ونەرىنە باعا بەرىپ، ۇزدىكتەرىن انىقتادى.