بۇگىن – 14 اقپان، حالىقارالىق كىتاپ سىيلاۋ كۇنى
بۇگىن ساۋلە دوسجانوۆا ءوزىنىڭ جازعان كىتاپتارىن جامبىل اتىنداعى الماتى قالاسىنىڭ جاسوسپىرىمدەر كىتاپحاناسىنا تارتۋ ەتتى، دەپ حابارلايدى Almaty-akshamy.kz.
ەلىمىزدە كىتاپ سىيعا تارتۋ كۇنى 2012 جىلدان بەرى اتالىپ كەلەدى. نەگىزى بۇل اتاۋلى كۇننىڭ شىعۋىنا بالالار كىتاپتارى سايتىنىڭ يەسى، ءۇش بالانىڭ اناسى ەممي برودمۋر اتتى اقش-تىڭ تۇرعىنى سەبەپكەر بولعان ەكەن. ول بىردە بالاسى ەكەۋى اڭگىمەلەسىپ وتىرعاندا: «نەگە ادامداردىڭ بىر-بىرىنە ەشقانداي سەبەپسىز كىتاپ سىيلايتىن كۇن جوق؟»، - دەپ سۇرايدى بالاسى. وسىدان كەيىن ەممي 2012 جىلى 14 اقپان كۇنىن «كىتاپ سىيعا تارتۋ كۇنى» رەتىندە اتالۋ ۇسىنىسىن العا تارتادى. كىشكەنە بالانىڭ ۇسىنىسى وسىلايشا قولداۋ تاۋىپ، حالىقارالىق دەڭگەيدە اتالىپ كەلەدى.
شىندىعىندا، كىتاپ - ەڭ جاقسى سىيلىق! ءبىز ءبىلىم تەڭىزىنە وسى كىتاپ ارقىلى ءجۇزىپ شىعامىز. كىتاپ وقۋ ارقىلى ءسوز بايلىعىمىز ارتىپ، ءبىلىم كوكجيەگى كەڭەيەدى. سارقىلماس اقىل الارىمىز انىق. سوندىقتان جاقىندارىڭىزعا كىتاپ سىيلاڭىزدار.
– كىتاپحانادا جاستار كوپ. ءبىلىم العانى كوڭىلىمىزدى كوتەرەدى. مەن دە وسىندا وتىرىپ، ءبىر كىتابىمدى جازعان بولاتىنمىن. وقىرماندارىڭىز كوپ بولسىن! جاستارىمىز ءبىلىمدى بولعاي، - دەدى ساۋلە دوسجانوۆا.
عالىمداردىڭ زەرتتەۋى بويىنشا، كىتاپ وقۋ سترەسكە قارسى جاقسى شارا ەكەندىگىن كورسەتكەن. كىتاپتى كوپ وقىعان سايىن ميداعى نەيروندىق بايلانىستار ارتتا تۇسەدى ەكەن. ال دارىگەر مامانداردىڭ ايتۋىنشا، كىتاپ وقۋدى ادەتكە اينالدىرۋ ەگدە جاستا الجىماۋعا، السگەيمەر اۋرۋىنا شالدىقپاۋعا سەپتىگىن تيگىزەدى ەكەن.