كىتابىنان تۇسكەن قارجىنى ناۋقاس بالالارعا جۇمساعان

مينيستر جازۋشى قىزدى ماراپاتتادى

ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ جاس ەكوبەلسەندى ديانا مىرزاعالييەۆامەن كەزدەسىپ، ونى قۇرمەت گراموتاسىمەن ماراپاتتادى، دەپ حابارلايدى Almaty-akshamy.kz.

مينيستر ديانانىڭ ءومىرى تۋرالى ب ا ق بەتتەرىنەن وقىپ، ۇلكەن اسەرگە بولەندى.

ديانا شىعىس قازاقستان وبلىسىندا دۇنيەگە كەلگەن. بالا كەزىنەن دارىگەرلەر وعان ديزارتريا (سەرەبرالدى سال اۋرۋىنىڭ جەڭىل ءتۇرى) دياگنوزىن قويدى.

ول تولىققاندى سويلەي المادى. ونىڭ بۇل جاعدايعا دۋشار بولۋى سەمەي يادرولىق پوليگونىنداعى سىناقتىڭ سالدارى بولۋى دا مۇمكىن.

ديانا دەنساۋلىعى سىر بەرگەن ءتورت بالانىڭ ءومىرى جايلى «اقسۋ-جاباعىلىنىڭ سيقىرلى الەمى» اتتى ەرتەگى كىتابىن جازدى.

ول ءوز شىعارماسى ارقىلى ەرەكشە بالالارعا جانە تابيعاتتى قورعاۋعا قامقورلىقپەن قاراۋعا ناسيحاتتاپ قانا قويماي، بالالاردىڭ ءومىرى مەن دەنساۋلىعىن ساقتاۋعا ءوز ۇلەسىن قوسقىسى كەلدى.

وسىلايشا، كىتاپتى ساتۋدان تۇسكەن بارلىق قاراجاتتى ونكولوگيامەن اۋىراتىن بالالاردىڭ ەمىنە جىبەرىپ وتىر. بۇگىنگە دەيىن ساتىلىمنان 250 000 تەڭگە تۇسكەن.

كەزدەسۋ بارىسىندا سەرىكقالي برەكەشيەۆ جاس ەكولوگقا، ونىڭ اتا-اناسىنا جانە وقىتۋشىسىنا العىسىن جەتكىزدى.

ول سونداي-اق مينيسترلىك جەتەكشىلىك ەتەتىن ەكولوگيالىق جوبالارعا قاتىسۋدى، ەكووقىتۋ جونىندەگى اكسيالارعا قاتىسۋدى جانە «اقسۋ-جاباعىلى» ۇلتتىق پاركىنە بارۋدى ۇسىندى.

مينيستر ەكوبەلسەندىنى قۇرمەت گراموتاسىمەن ماراپاتتاپ، اتا-اناسىنا جانە ۇستازىنا العىس حاتتار تابىس ەتتى.