الماتىدا ەكى جىل بۇرىن بەلسەندى ۇزاق ءومىر ءسۇرۋ ورتالىقتارى قۇرىلدى. بۇلار - زەينەتكەرلەردىڭ دەنساۋلىعىن ساقتاۋ مەن بوس ۋاقىتىن ۇيىمداستىرۋمەن كاسىبي تۇردە اينالىساتىن ورىندار. قالالىق ءماسليحاتتىڭ دەپۋتاتى، ەكى بەلسەندى ۇزاق ءومىر ءسۇرۋ ورتالىعىنىڭ جەتەكشىسى ءاسيا ماقانوۆا زەينەتكەرلەردى ۋاقىتپەن بىرگە ادىمداۋعا، فيزيكالىق جانە پسيحولوگيالىق تۇرعىدان قولداۋعا قالاي ۇيرەتەتىنىن ايتىپ بەردى، دەپ حابارلايدى almaty-akshamy.kz
وڭىرلىك كوممۋنيكاسيالار قىزمەتى الاڭىندا سويلەگەن سوزىندە ءا. اقانوۆا المالى جانە اۋەزوۆ اۋداندارىنداعى بەلسەندى ۇزاق ءومىر ءسۇرۋ ورتالىعىن باسقارىپ وتىرعانىن ايتتى.
«ءبىزدىڭ ورتالىقتاردا زەينەتكەرلەر وزدەرىنە ۇنايتىن كاسىپپەن اينالىسىپ قانا قويماي، جاڭا دوستار تابا الادى. ءبىزدىڭ ءار ورتالىققا 300-گە جۋىق ادام كەلەدى، زەينەتكەرلەر فيتنەس، يوگامەن اينالىسادى، شاحمات، دويبى ويناپ ۋاقىت وتكىزەدى، سكانديناۆيالىق جۇرىسپەن اينالىسادى، ولارعا مەديسينالىق پۋنكت قىزمەتى كورسەتىلەدى. قالاۋى بويىنشا سمارتفوندى، الەۋمەتتىك جەلىلەردى، قاجەتتى DamuMed، eGov قوسىمشالارىن جانە كومپيۋتەردى مەڭگەرۋگە، سونداي-اق قازاق جانە اعىلشىن ءتىلى كۋرستارىنان وتۋگە بولادى»، - دەدى ءاسيا اقانوۆا.
الماتىنىڭ بەلسەندى ۇزاق ءومىر ءسۇرۋ ورتالىقتارىنداعى ساباقتار ەمدىك دەنە شىنىقتىرۋدان باستاپ پسيحولوگيالىق كەڭەس بەرۋگە دەيىن ءارتۇرلى. كوبىسى ونەردى، سونىڭ ىشىندە بي مەن ۆوكالدى، بۇدان باسقا اسپازدىق جانە موتيۆاسيالىق كۋرستاردى جاقسى كورەدى.
ءاسيا اقانوۆا 2018 جىلدان باستاپ ورتالىقتارعا 5 مىڭنان استام زەينەتكەر كەلگەنىن اتاپ ءوتتى. قاريالاردىڭ پسيحولوگيالىق جاعدايى ەداۋىر جاقساردى، ولار كوپشىل بولا باستادى، دەنساۋلىعىندا بەلگىلى ءبىر ناتيجەلەر بايقالدى، ويتكەنى ماماندار اۋرۋدىڭ الدىن الۋعا ەرەكشە نازار اۋدارادى.
الماتىدا بارلىعى توعىز بەلسەندى ۇزاق ءومىر ءسۇرۋ ورتالىعى جۇمىس ىستەيدى، ولاردىڭ جۇمىسى تۋرالى تولىق اقپاراتتى كولل-ورتالىقتىڭ 1308 ءنومىرى ارقىلى بىلۋگە بولادى.