«ب ا ق تۋرالى» زاڭدا جانە ەلىمىزدىڭ ەڭبەك كودەكسىندە جۋرناليستەردىڭ مارتەبەسى تۋرالى باپ جوق.
سەنات دەپۋتاتى نۇرتورە ءجۇسىپ وسى ماسەلە بويىنشا پرەمەر-مينيسترگە ساۋال جولدادى، دەپ حابارلايدى Almaty-akshamy.kz
ءجۋرناليستىڭ قوعامداعى ورنى زاڭ جۇزىندە انىقتالماعان. سالالىق زاڭدا جۋرناليستەردىڭ قۇقىقتارى مەن مىندەتتەرى عانا جازىلعان. سەناتوردىڭ ايتۋىنشا، مۇنىڭ ءبارى جۋرناليستەردىڭ وتە جاۋاپتى جانە ءقاۋىپتى جۇمىسىن ەسكەرمەۋ.
«ەلىمىزدەگى ب ا ق تۋرالى زاڭدا جانە ەڭبەك كودەكسىندە جۋرناليستەردىڭ مارتەبەسى مەن كەپىلدىكتەرى تۋرالى ەشقانداي باپ جوق. انىعىراق ايتساق، ب ا ق تۋرالى زاڭنىڭ 20-بابىنداعى 10 قۇقىعى مەن 21-بابىنداعى 5 مىندەتى عانا جازىلعان. ەڭبەك كودەكسىندە مارتەبە جونىندە ءبىر اۋىز ءسوز، ءتىپتى جۋرناليستەردىڭ ەڭبەك ەتۋ قۇقىقتارى دەگەن ءبولىم دە جوق»، – دەدى نۇرتورە ءجۇسىپ.
سونداي-اق اقپاراتقا قولجەتىمدىلىكتى دە جەكە رەتتەۋ قاجەت.
«كەيبىر شەنەۋنىكتەر توتەنشە جاعداي كەزدەرىندە جۋرناليستەردىڭ سۇراعىنا كاسىبي دەڭگەيدە جاۋاپ بەرۋگە دايىن بولماي جاتادى. كاسىبي قىزمەتىن اتقارىپ جۇرگەن تىلشىگە كەدەرگى كەلتىرۋ – حالىقتى مەملەكەتتىك اقپارات الۋ مۇمكىندىگىنەن ايىرۋ دەگەن ءسوز. كورشىمىز رەسەيدەگى جاعداي مۇلدە باسقاشا. جۋرناليستەردىڭ كاسىبي مىندەتىنە كەدەرگى كەلتىرگەندەر، جۋرناليستەرگە شابۋىل جاساعاندار 6 جىلعا دەيىن تۇرمەگە قامالاتىن ارنايى باپ تا ەنگىزىلگەن»، – دەدى ول.
سونىمەن قاتار دەپۋتات جۋرناليستەرگە پوليسەيلەرگە جاسالعانداي جاعداي نەگە جاسالمايتىنىن سۇرادى.
ونىڭ ايتۋىنشا، پاندەميادان 200-گە تارتا جۋرناليست پەن جازۋشى ومىردەن ءوتتى. اقش-تا جۋرناليستەردىڭ جالاقىسى جىلىنا 28 مىڭنان 75 مىڭ دوللارعا دەيىن جەتەدى. ال بىزدە ءبىر جىلدا تاباتىنى 3-4 مىڭ دوللار شاماسىندا عانا. تۇركيا، ازەربايجان سياقتى ەلدەردىڭ دە بىزدەن كوش ىلگەرى.
«قۇرمەتتى اسقار ۇزاقباي ۇلى! وتاندىق ماسس-مەديا "حالىق ۇنىنە قۇلاق اساتىن مەملەكەت" تۇجىرىمداماسىنىڭ پارمەندى قۇرالى بولۋى ءتيىس. جۋرناليستەرگە سوت، پروكۋراتۋرا، ىشكى ىستەر، ادۆوكات، نوتاريۋس سياقتى ناقتى مارتەبە بەرەتىن كەز كەلدى. اقپارات سالاسىن دامىتۋدىڭ 2021-2025 جىلدارعا ارنالعان ۇلتتىق جوسپارىن جاڭادان جاساۋ قاجەت. باق-تىڭ ىقپالىنسىز قوعامدى دەموكراتيالاندىرۋ مۇمكىن ەمەس. سوندىقتان جۋرناليستەردى ارنايى الەۋمەتتىك مارتەبە ارقىلى قولداۋدى ۇسىنامىز. ول ءۇشىن "جۋرناليست مارتەبەسى تۋرالى" ارنايى زاڭ قابىلداۋ قاجەت دەپ ويلايمىن»، – دەدى نۇرتورە ءجۇسىپ.