كينو - ونەردىڭ تورەسى.
كينو ارقىلى قوعامداعى كوپتەگەن ماسەلەنى شەشۋگە بولادى. شەشىلىپ تە جاتىر. بۇل تۋرالى اكتەر، ق ر مادەنيەت قايراتكەرى بولات مامىتبەكوۆ Almaty-akshamy.kz-كە بەرگەن سۇحباتى بارىسىندا ايتتى.
ەگەر جاقسى جاعىنا قاراي جۇمىس جاساي بىلسە، كينونىڭ ادامزاتقا پايداسى زور ەكەندىگىن ايتادى اكتەر. ونىڭ ايتۋىنشا، قازىرگى تاڭدا كينو سالاسىندا، كينو يندۋسترياسىندا كوپتەگەن جاقسى جاڭالىق بولىپ جاتىر. بۇگىنگى تاڭدا ەلىمىزدە جىلىنا ءۇش ءجۇز-تورت جۇزدەي فيلمدەر جارىق كورۋدە.
«قازاقستان عارىشتاپ دامىعان سايىن، كينو ونەرى دە دامىپ كەلە جاتىر»، - دەيدى اكتەر.
بۇگىنگى «توميريس» فيلمدەرى كەزىندەگى «قىز جىبەك» سياقتى الەمگە تانىلىپ جاتقانىن ايتقان ول، قازىرگى كينو سالاسىنداعى اكتەر، رەجيسسەرلەردىڭ جۇمىسى شەتەلدىك مامانداردان ەش كەم ەمەستىگىن العا تارتتى. كينو سالاسى ماماندارىنىڭ، تىپتەن شەتەلدىك ارىپتەستەرىنەن اسىپ تۇسەتىن دە تۇستارى بار ەكەن.
«كينونى قولعا العاندا اركىم ءوزىنىڭ ماقساتىنا قاراي جۇمىس ىستەيدى. ءبىرى كينونى قارجى تابۋ ماقساتىندا تۇسىرسە، ەندى ءبىرى كەرەمەت تاريحي تۋىندى جاساۋدى ماقسات ەتەدى»، - دەدى اكتەر.
ول ءوزىنىڭ نەگىزگى ماقساتتارىنىڭ ءبىرى ادامزاتقا وي سالاتىن، ىزگىلىككە باستايتىن كينو ءتۇسىرۋ، تاريحي تۋىندى جاساۋ ەكەندىگىن دە جاسىرمادى.
«مەنىڭ نەگىزگى ماقسات-مۇددەم تاريحي تۋىندى جاساۋ. اكتەر بولعاننان كەيىن ءتۇرلى كينو جانرلارىنا ۇسىنىستار ءتۇسىپ جاتادى. كومەديا جانرلارىندا وينادىم. بۇنىڭ ءبارى ارينە، تاجىريبە جيناۋعا، ءوزىڭدى دامىتۋعا، ءبىر ورىندا توقتاپ قالماۋعا ۇلكەن قىزمەت جاسايدى. كەيدە، ءتىپتى جاسىراتىنى جوق، قارجى كوزى ءۇشىن دە رولدەردى سومداۋىڭا تۋرا كەلەدى»، - دەيدى ول.
ول ستۋدەنت كەزدەن شاكەن ايمانوۆتى كوپ زەرتتەگەن. ايمانوۆ ويناعان رولدەردى سومداپ كورۋ ونىڭ باستى ارماندارىنىڭ ءبىرى.
«98 جىلدار ەكىنشى كۋرستا وقىپ جۇرگەن كەزىمدە مەندە شاكەن ايمانوۆتىڭ 100 جىلدىعىندا نە سپەكتاكلدەن، نە كينودان ورىن الامىن دەگەن ارمان پايدا بولدى. ءبىراق ازىرگە ول ارمانىما جەتە المادىم. ول بولاشاقتىڭ ەنشىسىندە دەپ ۇمىتتەنەمىن. شاكەن ايمانوۆ ويناعان رولدەردى، بەينەلەردى سومداپ كورگىم كەلەدى. ايمانوۆ – ۇلى رەجيسسەر، جان-جاقتى كەمەلدىككە جەتكەن ادام. سول كىسىدەي بولۋدى ارماندايمىن»، - دەيدى بولات مامىتبەكوۆ.
مادەنيەت قايراتكەرى بولات مامىتبەكوۆ كينو فيلمدەردە رولدەردى سومداۋمەن قاتار، رەجيسسەرلىكپەن دە اينالىسىپ، سپەكتاكلدەر دە قويادى، تەاتردا دا وينايدى. ءوزىنىڭ ايتۋىنشا، مۇنداي شىعارماشىلىقپەن اينالىسۋ وعان ويىن شىڭداۋعا سەپتىگىن تيگىزەدى. كەيىنگى تورت-بەس جىلدا شاكىرتتەر تاربيەلەپ جۇرگەن ول دراماتۋرگيانى دا قولعا العانىن ايتتى. تەك ونى ازىرگە قۇپيا ساقتاعاندى ءجون كوردى. ۋاقىتى كەلگەندە جارىققا شىعىپ، كورەرمەنمەن قاۋىشاتىن ءساتتى كۇتۋدە.
ونىڭ وسىناۋ ماماندىقتى تاڭداعان ساتتەن بەرى، ساناسىنىڭ تۇكپىرىندە ساقتالىپ تۇرعان نەگىزگى ماقساتتارى دا بار. ول ماقساتتارىنا جەتەتىنىنە دە سەنىم ارتادى.
«ەڭ الدىمەن، «كوكشەتاۋ» پوەماسى بويىنشا كينو تۇسىرسەم دەگەن وي بار. بۇل پوەما تولعان دانالىق، تەرەڭ فيلوسوفيا. وسىنى كينودا كورسەتكىم كەلەدى. ودان كەيىن ورالحان بوكەيدىڭ «اتاۋ كەرەسىنە» كينو جاساعىم كەلەدى. سانامنىڭ تۇكپىرىندە ساقتالىپ تۇرعان تاعى ءبىر ارمان-ماقساتىم وسپان باتىر تۋرالى فيلم جاساۋ»، - دەدى مادەنيەت قايراتكەرى.
ايتا كەتەيىك، بولات مامىتبەكوۆ العاشقى ءرولىن «مەكتەپ» سەريالىندا حيميا ءپانىنىڭ ءمۇعالىمىن سومداۋدان باستاعان. كەيىن «حابار» تەلە ارناسى تۇسىرگەن «مەنىڭ تاعدىرىم» كينوسىنا جانە «اتا-انا. بالا-شاعا.» كومەدياسىنا، «الپىستان اسىپ بارامىن»، «ادىلەت الاڭى»، ت.ب. فيلمدەرگە تۇسكەن.
ەسكە سالا كەتسەك، بۇگىن ەلىمىزدە كينو كۇنى اتالىپ وتۋدە.