كىنالى كيىك ەكەن...

باتىس قازاقستان وبلىسىنىڭ وڭتۇستىك اۋداندارىنداعى شارۋاشىلىقتارعا كيىكتەن 7،9 ميلليارد تەڭگە زالال كەلگەن.

ارنايى قۇرىلعان كوميسسيا ءاربىر قوجالىقتىڭ جەرىن ارالاپ، بيىلعى شابىلعان ءشوپتىڭ كولەمىن انىقتاپ، وسىنداي قورىتىندىعا كەلدى. قاراقۇرىم كيىك 1 ميلليون 284 مىڭ گەكتار جايىلىم-شابىندىقتى تاپتاپ، 5 مىڭ گەكتار استىقتى القاپتى وتاپ كەتكەن.

ءقازىر كەلگەن شىعىندى وتەۋ تۋرالى ەسەپ-قيساپ اۋىلشارۋاشىلىق مينيسترلىگىنە جىبەرىلدى. بۇل تۋرالى  وبلىس اكىمدىگىندە وتكەن كەڭەستە بەلگىلى بولدى. مامانداردىڭ مالىمدەۋىنشە، جانىبەك، كازتالوۆ، جاڭاقالا، اقجايىق، بوكەي ورداسى اۋداندارىندا مال ازىعىن دايىنداۋ بويىنشا   جاعداي كۇردەلى.  ءوڭىردىڭ مال ازىعىنا قاجەتتىلىگى 2100 توننا بولسا، سونىڭ 59% عانا ءازىر. ونىڭ باسىم بولىگى بىلتىردان قالعان جەم-شوپ قورى.

- كۇنى بۇگىنگە 1300-گە جۋىق شارۋا قوجالىعىنا التى اۋداننىڭ انىقتالعان جەرلەرگە 7،9 ميلليارد تەڭگە قاراستىرۋ جونىندە جاساقتالعان مەتوديكا بويىنشا ەسەپ تولىعىمەن اۋىلشارۋاشىلىق مينيسترلىگىنە جولداندى. بۇل ەشقانداي توتەنشە جاعداي ەمەس. كيىك ماسەلەسىنەن زارداپ شەككەن جاعدايدا تولەنەتىن قارجى. رەسپۋبليكالىق بيۋدجەتتەن قاراستىرىلىپ، تولەنۋ جاعدايى قاراستىرىلىپ جاتىر، دەيدى  اۋىل شارۋاشىلىعى باسقارماسىنىڭ باسشىسى ناۋرىزباي قاراعويشين.