قازاقستاندا اۋعان كاسىپكەرلەرىمەن بىرلەسە ساۋدا ءۇيىن اشۋدى پىسىقتاۋ كەرەك. بۇل تۋرالى قازاقستان مەن اۋعانستان بيزنەس-فورۋمىندا «اتامەكەن» ۇلتتىق كاسىپكەرلەر پالاتاسىنىڭ ءتوراعاسى رايىمبەك باتالوۆ ءمالىم ەتتى، دەپ حابارلايدى Almaty-akshamy.kz.
«ءبىز اۋعانستان وندىرۋشىلەرمەن بىرلەسە وسىنداي جوبانى باستاپ، ەلىمىزدە قازاقستان-اۋعانستان ساۋدا ءۇيىن اشۋعا دايىنبىز. بۇل تۇرعىدا وندا اۋعان ونىمدەرىنىڭ تۇراقتى كورمە زالىن جابدىقتاۋعا دايىنبىز»، - دەدى ر. باتالوۆ.
وسى ورايدا بيزنەس-فورۋمدا اتالعان ساۋدا ءۇيىن الماتىدا اشۋ تۋرالى ۇسىنىس ايتىلدى.
سونىمەن قاتار ر.باتالوۆ قازاقستان ۇكىمەتىنىڭ باستاماسىمەن قازاقستان اۋعانستاننىڭ گەرات قالاسىندا ەلىمىزدىڭ ساۋدا ءۇيى اشىلعانىن ەسكە سالدى.
اتالعان شاھاردى تاڭداۋ كەزدەيسوق ەمەس، ويتكەنى پروۆينسيا يران، پاكىستان جانە تۇرىكمەنستانعا باراتىن جولداردى بايلانىستىرۋ تۇرعىسىنان ماڭىزدى.
«الداعى ۋاقىتتا قاراستىرۋعا دايىن تۇرعان كەلەسى قادام – بىرلەسكەن ساۋدا-ونەركاسىپ پالاتاسىن اشۋ. ءقازىر بۇل تاجىريبەنى ءبىرقاتار ەلدەرمەن ىسكە اسىرىپ جاتىرمىز»، - دەدى ول.
بۇدان بۇرىن حابارلانعانداي، قازاقستان اۋعانستان اراسىنداعى تاۋار اينالىمى 3 ملرد اقش دوللارىنا جەتۋى مۇمكىن.
قازاقستان مەن اۋعانستان اراسىنداعى تاۋار اينالىمى 2022 جىلى ءىس جۇزىندە 1 ملرد اقش دوللارى (987،9 ملن. اقش دولل.) بەلگىسىنە جەتىپ، 2021 جىلعى كورسەتكىشتەردەن ەكى ەسە ارتتى. تاۋار اينالىمىنىڭ 90% قازاقستاندىق ەكسپورتقا، نەگىزىنەن وڭدەلگەن ونىمگە تيەسىلى. ەلدەر اراسىنداعى ساۋدا بيىلعى 6 ايدا 343،6 ملن اقش دوللارىن قۇرادى، ونىڭ ىشىندە قازاقستان ەكسپورتى 334،5 ملن دوللارعا جەتتى.