ءبىزدىڭ حالىقتى ءتۇسىنۋ قيىن بوپ بارادى. مىنا ءتاجتاجالدىڭ بەتى قايتار ءتۇرى جوق. سول ىندەتپەن دۇنيەجۇزى حالقىمەن بىرگە قارسى كۇرەسۋ، ساقتانۋ شارالارىن جاساۋدىڭ، سول بالە جۇقتى ما، اناليز تاپسىرىپ ءبىلۋدىڭ ورنىنا، ءبىز نەشە ءتۇرلى اڭگىمە تاراتىپ، ودان قالسا، كەرەك كەزىندە پتر سپراۆكا، ۆاكسينالىق پاسپورت ساتىپ الۋ جاعىن قاراستىرامىز دا. جانىم اۋ، ول پتر، سول ەكپە سەنىڭ ءوز دەنساۋلىعىڭ، جەكە باسىڭنىڭ اماندىعى ءۇشىن كەرەك ەمەس پە؟ جوق، ءبىز انىقتاما ساتىپ الامىز دا، "ءمينيستردى ورنىنان الۋ كەرەك"، "وليمپيادادا جەردە قاراپ قالدىق" دەپ عالامدىق اڭگىمەلەر ايتامىز..
سوسىن تانىسىمىز ءتاجتاجالدان قايتىس بوپ جاتسا، "قوي، ودان ەمەس شىعار" دەپ بەت سيپايمىز. ۇكىمەت دىم ىستەمەيدى دەپ قويامىز تاعى دا. بەيقامبىز. ەكى جىلعا قارادى، بۇل الەمدى جايلاعان ىندەتتەن ءارقايسىمىز ءوزىمىز ساقتانۋىمىز كەرەك ەكەنىن ءالى تۇسىنبەيمىز. جوعارىدا ايتقانداي، جالعان قۇجات جاساتىپ، قىلمىسقا بارامىز.
ق ر ءىىم رەسمي مالىمەتى بويىنشا، سوڭعى كۇندەردە جالعان مەديسينالىق قۇجاتتار جاساۋ فاكتىسى بويىنشا 110 قىلمىستىق ءىس قوزعالىپتى. ونىڭ 50ء-ى ۆاكسينا الدى دەگەن جالعان مەديسينالىق پاسپورت بويىنشا، 60-ى جالعان پتر انىقتاماسىن جاساعانى ءۇشىن. مينيستر ە.تۇرعىمبايەۆتىڭ رەسمي مالىمدەمەسى بويىنشا، ەلدە جالعان مەديسينالىق قۇجات جاساۋدىڭ جۇيەسى قالىپتاسقان ەكەن. ول سحەما بويىنشا ەمحانالار مەن اۋەجاي، تۋريستىك اگەنتتىكتەردە، باسقا دا جەرلەردە بەلگىلى ءبىر ادامدار جۇمىس جاسايتىن كورىنەدى. وسىنداي زاڭسىز دا "قارجىلى" قىزمەتى ءۇشىن 20 مەديسينا قىزمەتكەرى، 8 دەلدال ۇستالعان.
ال الماتى اۋەجايىندا "مەديسينالىق پاسپورتتى" 100 مىڭ تەڭگەدەن ساتقان ادام ۇستالعان. بۇل نە بوپ كەتتى؟ قاسىرەتتەن دە قارجى جاسايتىن زامان بولعان با؟! قايدا بارامىز؟ كىمدى الدايمىز؟ تۇسىنبەي وتىرمىز.