كيىم كيۋ ۇلگىسى ءبىراز دۇنيەنى اڭعارتادى
ەل اراسىندا «كيىمىنە قاراپ قارسى الادى، سوزىنە قاراپ شىعارىپ سالادى» دەيتىن ماقال-ماتەل بار. مۇنى كوبىنە سلاۆيان جۇرتى كوپ قولدانادى. وسىعان قاراپ كوپ نارسەنىڭ بايىبىنا بارۋعا بولادى. ءبىز ءسۇرىپ وتىرعان قوعامنىڭ ءوزى دە وسىنى تالاپ ەتىپ تۇرعانداي.
جاراسىمدى كيىم - ادامنىڭ اجارى. ءقازىر مودانىڭ نەشە ءتۇرى شىققان. ءتىپتى كوز ىلەسپەيدى. قىزىعاسىز، تاڭعالاسىز. ءبىر جاعى، ءسان الەمىنە جەتىپ ۇلگەرمەيمىز. ويتكەنى، كۇنىنە قانشاما جاڭا دۇنيەلەرگە جولىعامىز. الەۋمەتتىك جەلى ارقىلى تاماشالايمىز. بالكىم، زاماننىڭ تالابى دا سولاي بولىپ تۇرعان شىعار.
جاستار ءبارىن «ترەند» تەرمينىمەن ولشەيدى. سول ارقىلى كيىمنىڭ نارىقتاعى قۇنى باعالانادى. سوڭعى ۋاقىتتارى ۇلتتىق ناقىشتاعى دۇنيەلەر كوپشىلىككە قايتا تانىلىپ كەلە جاتىر. ءبىرشاما ۋاقىت بويى كوزدەن عايىپ بولعانداي بولىپ ەدى. مۇنىسى قۋانتادى. كوڭىلىمىزدى جادىراتادى. جاس جىگىتتەر قىس مەزگىلىنە ارنالعان بورىك كيىپ جۇرەدى. ەندى بىرەۋلەر ىشىك، Doji Gavana سىندى برەندكە قۇشتار. ارينە، ول ءۇشىن قوماقتى قاراجات تا كەرەك. بىلايشا ايتقاندا، اركىم "كورپەسىنە قاراي كوسىلەدى".
امەريكالىق جانتانۋ ءىلىمىن زەرتتەۋشىلەر كيىمگە قاراپ كىسىنىڭ مىنەز قۇلقىن، ءجۇرىس-تۇرىسىن، سويلەۋ ادەبىن اڭعارۋعا بولاتىنىن دالەلدەگەن. بۇل بۇگىن عانا پايدا بولعان بولجام ەمەس، سوناۋ عاسىرلاردان بەلگىلى دۇنيە سياقتى. سەبەبى بايلار پاديشالار جىبەك، بارقىن ماتالارىنان كيىم تىكتىرىپ كيسە، پاتشايىمدار نەشە ءتۇرلى اشەكەي تاعىنعان. سودان-اق قاي دارەجەدەگى ادام ەكەنى بەلگىلى. سوعان ساي مىنەزى دە بولادى.
ال قازىرگى تاڭدا جاپپاي ۇقساستىق ورىن العان. ءسال بۇرىنىراقتا قىزىلدى-جاسىلدى دۇنيە تەك قىز-كەلىنشەكتەر قاۋىمىنا جاراساتىنداي كورىنەتىن. بۇگىندە ول قاعيدات مۇلدە باسقاشا كورىنىس تاپقان. وسىدان-اق ارعى جاعىن باعامداي بەرىڭىز!
قورىتۋ. قازاقتا «ادام كوركى - شۇبەرەك، اعاش كوركى - جاپىراق» دەپ جاتادى. ونى راس. جاراسىمدى كيىم ادامنىڭ ىشكى سىرتقى جان دۇنيەسىنە ءوز اسەرىن بەرەرى انىق. ايتارىمىز، باستىسى، ۇيلەسىم تاپسا بولعانى.