كيىم ءوندىرىسى سۇرانىستى تولىق قامتاماسىز ەتە الماۋدا

قازاقستاندا كيىم ءوندىرىسى قۇندىق ماندە ون جىل قاتارىنان ءوسىپ كەلەدى: وسى جىلدىڭ قاڭتار-ماۋسىم ايلارىندا ءوندىرىس كولەمى 36،7 ملرد تەڭگەگە جەتتى، بۇل 2023 جىلدىڭ سايكەس كەزەڭىمەن سالىستىرعاندا 11،5%-عا كوپ (يفو — 103،8%). الدىڭعى جىلى ءوسىم 18،6% (يفو — 102%) قۇراعان، دەپ حابارلايدى aqshamnews.kz.

ءوزىمىزدىڭ ءوندىرىس كولەمىنىڭ وسۋىنە قاراماستان، قازاقستانداعى كيىم شىعارۋ كولەمى سۇرانىستى تولىق قاناعاتتاندىرۋ ءۇشىن جەتكىلىكسىز بولىپ وتىر. نارىقتاعى كيىمدەردىڭ باسىم كوپشىلىگى شەتەلدىك ءوندىرىس بولىپ تابىلادى.

مىسالى، اعىمداعى جىلدىڭ قاڭتار-مامىر ايلارىندا تريكوتاجدان جاسالعان سىرتقى كيىمدەردىڭ جالپى رەسۋرستارىنىڭ 99،5%-ى يمپورتقا تيەسىلى بولسا، تريكوتاجدان باسقا سىرتقى كيىم سەگمەنتىندە يمپورتتىڭ ۇلەسى 99،4% قۇرادى. سونداي-اق، نارەستەلەرگە ارنالعان تريكوتاج كيىمدەر مەن اكسەسسۋارلار سەكتورىندا يمپورتتىڭ ۇلەسى 99،2%-دى قۇرادى، بۇل كورسەتكىش سۆيتەرلەر مەن جەمپىرلەر سەگمەنتىندە دە وسىنداي.

ءىش كيىمدەردىڭ يمپورتتىق ۇلەسى 99%-دى، تريكوتاجدان جاسالعان شۇلىق بۇيىمدارىنىڭ يمپورت ۇلەسى 94،7%-دى، ال سپورتتىق كوستيۋمدەردىڭ يمپورتتىق ۇلەسى 93،5%-دى قۇرايدى.