ءقازىر كيىك سانى 1،3 ملن-عا جەتكەن.
ۇكىمەت ولاردى قورعاۋ بويىنشا ءبىرقاتار كەشەندى شارالار قابىلدادى، ونىڭ ىشىندە كيىكتەردى پايدالانۋعا موراتوريي ەنگىزىلدى، دەپ حابارلايدى Almaty-akshamy.kz
ەكولوگيا جانە تابيعي رەسۋرستار مينيسترلىگىنىڭ مالىمەتىنشە، ەلىمىزدىڭ اۋماعىندا كيىكتەردىڭ دۇنيەجۇزىلىك پوپۋلياسياسىنىڭ 90%-دان استامى مەكەندەيدى. بۇل جانۋارلار سانىنىڭ ازايۋىنا بايلانىستى (2003 جىلى 21 مىڭ باس بولعان) ۇكىمەت ولاردى قورعاۋ بويىنشا ءبىرقاتار كەشەندى شارالار قابىلدادى، ونىڭ ىشىندە كيىكتەردى پايدالانۋعا موراتوريي ەنگىزىلدى.
قابىلدانعان شارالاردىڭ ارقاسىندا بۇگىندە كيىك سانى 1،3 ملن باسقا (تولدەۋ كەزەڭىنە دەيىن) جەتىپ وتىر. ايتا كەتۋ كەرەك، ولاردىڭ وڭتايلى سانى 700-800 مىڭدى قۇرايدى.
بۇل رەتتە اۋىل شارۋاشىلىعى جانۋارلارى مەن كيىكتەردىڭ اراسىندا جايىلىمدار مەن سۋارمالى جەرلەر ءۇشىن باسەكەلەستىك كۇشەيىپ، كيىكتەردىڭ ەگىندى تاپتاۋ جاعدايلارى جيىلەگەن.
وسىعان بايلانىستى، مينيسترلىك 2023 جىلى كيىك پوپۋلياسياسىن باسقارۋ جونىندەگى بيولوگيالىق نەگىزدەمە اياسىندا ولاردى عىلىمي زەرتتەۋدى جوسپارلادى. سونىڭ ناتيجەسىندە مىناداي ماسەلەلەر زەردەلەنەتىن بولادى:
1) كيىك پوپۋلياسيالارىنىڭ دامۋ بولجامى؛
2) كيىكتەردىڭ ارەالى مەن كوشى-قون جولدارىن ناقتىلاۋ؛
3) كيىكتەردىڭ ازىقتىق بازاسىن زەردەلەۋ؛
4) اۋىل شارۋاشىلىعىمەن باسەكەلەستىكتى تومەندەتۋ بويىنشا ۇسىنىستار ازىرلەۋ.
وسىعان بايلانىستى، ەگترم ورمان شارۋاشىلىعى جانە جانۋارلار دۇنيەسى كوميتەتى عىلىمي-زەرتتەۋ جۇمىستارى كەزەڭىندە 2022 جىلعى 28 جەلتوقسانداعى بۇيرىقپەن رەسپۋبليكانىڭ بۇكىل اۋماعىندا كيىكتەردى، ولاردىڭ بولىكتەرى مەن دەريۆاتتارىن پايدالانۋعا ءموراتورييدى عىلىمي نەگىزدەمەگە سايكەس 2024 جىلعا دەيىن ۇزارتتى.