كەشكى التىدان كەيىن اس ىشپەۋ دۇرىس پا؟

الەۋمەتتىك جەلى پايدالانۋشىلارى اراسىندا 18:00-دەن كەيىن تاماق ىشپەۋگە كەڭەس بەرىلگەن حابارلامالار تاراپ ءجۇر، دەپ حابارلايدى Almaty-akshamy.kz.

مۇنداي ديەتا سالماقتى ازايتىپ قانا قويماي، سونىمەن قاتار ساۋىعۋعا كومەكتەسەدى. Stopfake.kz بۇل اقپاراتتىڭ شىندىققا جاناسپايتىنىن، ياعني،  ميف ەكەندىگىن جاريالادى.

18:00-دەن كەيىنگى تاماقتانۋ وتە زياندى جانە ارتىق سالماقتىڭ تەز وسۋىنە اكەلەدى دەگەن تەوريانىڭ عىلىمي نەگىزى جوق جانە 23:00-دە جاتىپ، 6:00-دە تۇراتىن قاراپايىم ادامنىڭ «كلاسسيكالىق» كۇن تارتىبىنە سۇيەنەدى. ءقازىردىڭ وزىندە ەسكىرگەن جانە جوققا شىعارىلعان تەورياعا سايكەس، وسى رەجيمدە سوڭعى رەت ساعات 18:00-دە تاماقتانۋ ارقىلى 12 ساعات بويى اش ءجۇرۋ كەزەڭى قالىپتاسادى. بۇل سالماق جوعالتۋعا ىقپال ەتەدى ەكەن.

شىندىعىندا، بىرىنشىدەن، تاماق ءىشۋ مەن اش ءجۇرۋ ارقىلى سالماق جوعالتۋعا بولاتىنىنا عىلىمي نەگىز جوق. ەكىنشىدەن، ەگەر ادام 23:00-دە ەمەس، 2:00-دە جاتىپ، 10:00-دە تۇرسا، وندا 18:00-دەن باستاپ اش ءجۇرۋدىڭ ەشقانداي پايداسى جوق.

سونىمەن قاتار عالىمدار سالماق جوعالتۋ ءۇشىن ساعاتتاردى ەمەس، كالوريالار جيناۋ مەن جوعالتۋدى ەسەپتەگەن ءجون دەگەن قورىتىندىعا كەلدى.

نۋتريسيولوگتاردىڭ پىكىرىنشە، اقۋىزدار، مايلار جانە كومىرسۋلار اراقاتىناسىن ساقتاي وتىرىپ، ءار ەكى-تورت ساعات سايىن تۇراقتى تاماقتانعان دۇرىس.

بۇل رەتتە تاعام تاۋلىك ۋاقىتىنا قاراماستان بىردەي قورىتىلادى.

18:00-دەن كەيىن تاماقتان باس تارتۋ اعزانىڭ ساۋىعۋىنا ىقپال ەتەتىنىنە عىلىمي دالەلدەر جوق. كەرىسىنشە، مۇنداي قاتاڭ شەكتەۋلەر تاماقتانۋ ءتارتىبىنىڭ بۇزىلۋىنا، «رۇقسات ەتىلگەن» ۋاقىتتا شامادان تىس تاماقتانۋعا جانە بۇزىلۋلارعا اكەلۋى مۇمكىن.

ولاي بولسا، دەنساۋلىقتى جاقسارتۋ جانە ارتىق سالماقتان ارىلۋ ءۇشىن كەشكى التىدان كەيىن تاماق ىشپەۋ بويىنشا كەڭەستەر نەگىزسىز.