قازىرگى تاڭدا تولەم كارتالار ارقىلى زات ساتىپ السا، جۇمسالعان سومانىڭ بەلگىلى ءبىر پايىزى كليەنتتىڭ شوتىنا اۋدارىلادى. سونداي-اق بەلگىلى ءبىر دۇكەندەردە تولەم جاساعان ۋاقىتتا، كارتا يەسىنە بەلگىلى جەڭىلدىكتەر بەرىلەدى. بۇل – ءارتۇرلى ساۋدا سالالارىندا كەزدەسەتىن كليەنت تارتۋدىڭ كەڭ تارالعان ءادىسىنىڭ ءبىرى.
كارتا يەسىنە شاريعاتتا تىيىم سالىنباعان ەرەكشەلىكتەردى بەرۋگە رۇقسات ەتىلەدى. مىسالى، كارتا يەسىنە قىزمەت كورسەتۋدە ارتىقشىلىق بەرۋ، اۋە كومپانيالارىندا، قوناقۇيلەردە نەمەسە مەيرامحانالاردا باعانى تومەندەتۋ سەكىلدى جەڭىلدىكتەر بەرىلەدى. بەرىلگەن بونۋستار كليەنتتەردى ىنتالاندىرۋ بولىپ سانالادى.
ءبىرىنشىسى، تولەم كارتالارى شاريعات تالاپتارىنا ساي بولۋى كەرەك. كرەديت كارتالارىن (Credit Card) پايدالانىپ، ول ءۇشىن بونۋستار الۋعا بولمايدى.
ەكىنشىسى، تۇسكەن بونۋس شاريعاتتا تىيىم سالىنعان بولماۋى كەرەك. مىسالى، تىيىم سالىنعان جەرلەرگە كىرۋ بونۋس رەتىندە بەرىلسە، قولدانۋعا رۇقسات ەتىلمەيدى.
ءۇشىنشىسى، بونۋستىڭ ەسەسىنە كليەنتتەن كوميسسيا الىنباۋى كەرەك.
ءتورتىنشىسى، بونۋس قايتىمسىز بولۋى كەرەك. ەگەر بونۋس سەبەپتى تاۋاردى قىمبات باعامەن ساتسا جانە كليەنت بونۋسقا قول جەتكىزۋ ماقساتىندا تاۋاردى ساتىپ السا، قۇمار بولىپ سانالادى.
جوعارىدا كەلتىرىلگەن شارتتارعا ساي بولسا، تولەم كارتالارى ارقىلى تۇسكەن بونۋستاردى، جەڭىلدىكتەردى قولدانۋعا بولادى. ال شارتتارعا ساي كەلمەسە، قولدانۋعا بولمايدى.
ەكونوميكا تىلىندە «كەشبەك» ءسوزى اعىلشىن تىلىندە «سash» – ناقتى اقشا، «back» – قايتارۋ دەگەندى بىلدىرەدى.