بىزگە جاڭا قازاقستاندى جاسايتىن جاڭاشىل، وتانشىل، سەرگەك، ءبىلىمدى ۇرپاق كەرەك.
الماتى قالاسى ءماسليحاتىنىڭ دەپۋتاتى، م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ جاڭا قازاقستاندى قانداي ازاماتتار قۇراتىنى تۋرالى پىكىرىمەن ءبولىستى، دەپ حابارلايدى Almaty-akshamy.kz.
الماتى قالاسى ءماليحاتىنىڭ دەپۋتاتى كەجەحان ماتىجانوۆتىڭ پىكىرىنشە، مەملەكەت باسشىسى ۇكىمەتتىڭ كۇنى كەشە وتكەن كەڭەيتىلگەن وتىرىسىندا ەلىمىزدىڭ جاھاندىق كۇردەلى گەوساياسي سىن-قاتەرلەرگە قاراماستان، ءبىرقالىپتى دامىپ كەلە جاتقانىن اتاپ ءوتتى. وعان ءبارىمىز كۋامىز جانە جاقسى جاعىنان دامي بەرۋىنە تىلەكشىمىز دەپ سانايدى.
"دەگەنمەن، ءقازىر بارعا قاناعات دەپ توقمەيىلسىپ وتىراتىن ۋاقىت ەمەس. پرەزيدەنتىمىز ءبىراز ولقىلىقتىڭ اتىن اتاپ، ءتۇسىن تۇستەپ بەردى. ماسەلەن، ينفلياسيا ۇدەپ بارادى. ونى ساراپشى-ماماندار عانا ەمەس، قاراپايىم حالىق تا كورىپ، سەزىنىپ وتىر. ءقازىر كىم-كىمنىڭ ايتاتىنى دا قىمباتشىلىق. مەملەكەت باسشىسى وتاندىق ونىمدەرگە باسىمدىق بەرۋ كەرەكتىگىن تىلگە تيەك ەتتى. جاسىراتىنى جوق، ءبىز كەيدە ءوزىمىزدىڭ ءونىم مەن شەتەلدىك بۇيىم قاتار تۇرسا، جات ەلدىڭ جىلتىراعىنا قول سوزاتىنىمىز راس. بىزگە بالكىم، پاتريوتتىق سەزىم جەتپەي جاتقان شىعار. ءبىز ساناعا تۇرمىستىڭ ۇستەمدىك ەتكەنىن قالامايمىز. بىزگە جاڭا قازاقستاندى جاسايتىن جاڭاشىل، وتانشىل، سەرگەك، ءبىلىمدى ۇرپاق كەرەك"، - دەيدى دەپۋتات.
كەنجەحان ماتىجانوۆ پرەزيدەنت ءبىلىم سالاسىندا دا قوردالانعان ماسەلە كوپتىگىن اتاپ وتكەنىن ايتتى.
"كۇنى كەشە ءبىلىم جانە عىلىم مينيسترلىگى ەكىگە بولىنگەنىن بىلەمىز. بۇل تىڭ قادام سول ماسەلەلەردى شەشۋ ءۇشىن قاجەت بولعانى دا ايقىن. ەلىمىزدە جەتكىنشەكتەرگە قوسىمشا ءبىلىم بەرۋ جاقسى جولعا قويىلعان. بۇل – ورەندەردىڭ قارىم-قابىلەتىن، شىعارماشىلىعىن دامىتۋ ءۇشىن قولعا الىنعان تىڭ باستاما. قوسىمشا سپورتتىق جانە شىعارماشىلىق ءبىلىم بەرۋ ىسىنە دە مەملەكەت تاپسىرىسى بويىنشا قارجى بولىنە باستاعانى قۇپتارلىق قادام"، - دەيدى دەپۋتات.
ونىڭ پىكىرىنشە، بۇل ۇيىرمەلەر مەن سەكسيالارعا قاتىساتىن بالالار سانىن 70 پايىزعا دەيىن ارتتىرعان.
«بىلىمگە سالىنعان قاراجات مەملەكەت ءۇشىن ەڭ باستى ينۆەستيسيا بولۋى كەرەك. بۇل – وتە ماڭىزدى ماسەلە. تۇپتەپ كەلگەندە، دامۋدىڭ بىردەن-بىر جولى – ءبىلىم سالاسى. سوندىقتان بۇدان ەشكىم ۇتىلمايتىنى ءسوزسىز. ۇكىمەت پەن اكىمدەر جۇرتشىلىقپەن بىرلەسىپ، جوبانى جەتىلدىرۋگە ءتيىس. ونى ساپالى ءارى ءتيىمدى جاساۋ قاجەت. ناقتى عىلىمدار مەن ينجەنەريا سالاسى بويىنشا قوسىمشا ءبىلىم بەرۋگە ايرىقشا نازار اۋدارۋ كەرەك. بالالاردى دەنە شىنىقتىرۋ جانە اكادەميالىق تۇرعىدان بىردەي دامىتۋ قاجەت. اۋىلدىق جەردە تۇراتىن بالالارعا باسا ءمان بەرگەن ءجون. بارلىق ايماقتاعى بالالاردىڭ قوسىمشا ءبىلىم الۋىنا مۇمكىندىگى بولۋعا ءتيىس»، – دەدى مەملەكەت باسشىسى.
كەنجەحان ماتىجانوۆ ەندى ۇكىمەت پەن جاڭا مينيسترلىكتەردىڭ وكىلدەرى وتاندىق ءبىلىم مەن عىلىم سالاسىن تىڭ سەرپىنمەن دامىتۋعا كۇش سالاتىنىنا سەنەتىنىن ايتتى.