م.اۋەزوۆ اتىنداعى ادەبيەت جانە ونەر ينستيۋتىنىڭ ديرەكتورى، فيلولوگيا عىلىمدارىنىڭ دوكتورى كەنجەحان ماتىجانوۆ ءوزىنىڭ Facebook جەلىسىندەگى پاراقشاسىندا الماتىدا ورىن العان جاپپاي تارتىپسىزدىككە قاتىستى پىكىر ءبىلدىردى، دەپ حابارلايدى Almaty-akshamy.kz
بۇرىندارى ۆيرتۋالدى ومىردەن تاماشالاپ، ءىشىمىزدى تارتىپ جۇرگەن ۇرەيلى وقيعالاردىڭ ءدال ءبىزدىڭ قازاق ەلىندە ورىن الۋى جۇرەگىمىزدى قان جىلاتتى! كەشە عانا جايناپ تۇرعان الماتى ءقازىر قانداي كۇيگە ءتۇستى؟! بارشامىزدىڭ ماقتانىشىمىز ەمەس پە ەدى!؟ قالاي عانا قولى بارىپ، كوزى قيىپ قيراتتى ەكەن؟!
حالقىمىزدىڭ "جاراڭدى جاتقا بىلدىرمە"، "دوسقا كۇلكى، دۇشپانعا تابا بولما"، "ءوزىڭدى ءوزىڭ سىيلاساڭ، جات جانىنان تۇڭىلەدى"، "بيتكە وكپەلەپ، تونىڭدى وتقا جاقپا" دەگەن سياقتى حالىق دانالىعىن قالايشا ەستەن شىعاردىق!؟ "جاۋ جوق دەمە، جار استىندا..." دەگەننىڭ كەرى كەلدى.
اينالايىن اعايىندار، ەگەر ءبىز وتباسىمىزدىڭ بەرەكەسىن تىلەسەك، حالقىمىزدىڭ قامىن ويلاساق، ەلىمىزدىڭ ەرتەڭىنە الاڭداساق، ەسىمىزدى جيىپ، جەدەل سابىرعا كەلۋىمىز قاجەت. نيەتى بۇزىقتاردىڭ ارانداتۋىنا ەرىپ، دۇلەي كۇشتىڭ جەتەگىندە كەتىپ، ورنى تولماس وكىنىشكە تاپ بولعان باۋىرلار، رايلارىڭنان قايتىڭدار! تۋعان ەلىڭ، حالقىڭ، جۇرتىڭ، وتباسىڭ، اتا-اناڭ، بالا-شاعاڭ ءۇشىن تەڭدەسسىز باقىت - تۋعان وتانىمىزداعى ەركىن ەڭبەك پەن الاڭسىز بەيبىت ءومىر. ەگەمەندىكتىڭ ارقاسىندا باسىمىزعا ورناعان باعىمىزدىڭ قادىرىنە ءوزىمىز جەتپەسەك، جانىمىزدى سالىپ قورعاماساق، ونى بىزگە ەشكىم دە سىيعا تارتپايدى.
سوندىقتان دا بارشا قازاق ەلى، ءوزىمىزدىڭ پرەزيدەنتىمىزدىڭ توڭىرەگىنە ءتاستۇيىن بولىپ توپتاسۋىمىز كەرەك. وسىنداي سىن ساعاتتا ءبىر تۋدىڭ استىنا توپتاسۋ - ءبىزدىڭ ەلدىگىمىزگە سىن! قانداي قيىنشىلىقتى دا دانا حالقىمىز "ءبىر جاعادان باس، ءبىر جەڭنەن قول شىعارا" وتىرىپ جەڭگەن.
ءبىز ءبىر بولساق قانا قارالى كۇندەردى ارتقا تاستاپ، جارقىن بولاشاققا جەتە الامىز!
قارالى كۇن ءبىزدىڭ بىرلىگىمىزدى بۇرىنعىدان دا ارتتىرا ءتۇسىن!!! قازاق ەلى تۇتاس بولايىق، بەكەم، بەرىك بولايىق!!! سوندا عانا "جات جانىنان تۇڭىلەدى"!