بۇگىن تاڭەرتەڭ كەمەروۆوداعى لوگوۆايا تاس جولىندا ورىن العان اۋىر اپات سالدارىنان 67 ادام جاراقات الدى. كەمەروۆودان تۇسىرىلگەن كادرلاردا ترامۆايدىڭ قاتتى جىلدامدىقپەن بۇرىلىپ، ەسىكتەرى قۇلاپ، بىرنەشە جولاۋشى جولعا شىعىپ كەتكەنىن كورۋگە بولادى، دەپ حابارلايدى almaty-akshamy.kz
تاڭعى ساعات 07:30 شاماسىندا لوگوۆايا تاس جولىندا جۇرگەن №10 ترامۆاي تەجەگىش جۇيەسىنىڭ ىستەن شىعۋىنا بايلانىستى شامامەن 80 كم/ساع جىلدامدىقپەن جوعارىدان تومەن قۇلديلاعان. ترامۆايدىڭ جوعارى جىلدامدىعى سالدارىنان ىشىندەگى جانە ەسىك الدىندا تۇرعان جولاۋشىلار جولعا ۇشىپ كەتتى.
العاشقىدا 15 ادامنىڭ جاراقات العانى تۋرالى حابارلانعان. الايدا، شامامەن ءبىر ساعات وتكەن سوڭ، تاڭعى ساعات 9-دار شاماسىندا، قەتك باسپا ءسوز قىزمەتى مەن قالانىڭ بارلىق جەدەل قىزمەتتەرى وقيعا ورنىنان 30 ادام، ونىڭ ىشىندە ترامۆاي جۇرگىزۋشىسى دە اۋرۋحاناعا جەتكىزىلگەنىن مالىمدەدى.
اپاتتان زارداپ شەككەندەردىڭ سانى ۋاقىت وتە كەلە وسە ءتۇستى. قازىرگى ۋاقىتتا جاراقات العانداردىڭ سانى 67 ادامعا جەتتى. ابىروي بولعاندا ءولىم-جىتىم تىركەلگەن جوق.
وقيعا ورنىنا كەلگەن جەدەل قىزمەتتەر مەن قۇقىق قورعاۋ ورگاندارى اپاتتىڭ سەبەپتەرىن انىقتاۋ ءۇشىن تەرگەۋ جۇمىستارىن باستاعان. الدىن الا بولجام بويىنشا، تەجەگىش جۇيەسىنىڭ ىستەن شىعۋى اپاتقا باستى سەبەپ بولعان.