كەلىسىم بەرىلگەن ميتينگتى ۇيىمداستىرۋشىلار ونى وتكىزۋدەن باس تارتتى

«جاس كاسىپقويلار قوعامى» رەسپۋبليكالىق قوعامدىق بىرلەستىگى كەلىسىلگەن ميتينگتى وتكىزۋدەن ءوز ەرىكتەرىمەن باس تارتتى

«قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» زاڭىنا سايكەس، «جاس كاسىپقويلار قوعامى» ءرقب-نىڭ ءتوراعاسى م. جيەمبايەۆقا الماتى قالاسى اكىمدىگىنىڭ 2021 جىلعى 18 قاراشاداعى № 4/587 قاۋلىسىمەن 2021 جىلعى 27 قاراشادا ساعات 12.00-دەن 15.00-گە دەيىن شوقان ءۋاليحانوۆ اتىنداعى گۇلزاردا «قازاقستان رەسپۋبليكاسىنىڭ سوت تورەلىگىندە زاڭنىڭ ۇستەمدىگىن قامتاماسىز ەتۋ. قازاقستان رەسپۋبليكاسى سوت جۇيەسىنىڭ تۇبەگەيلى رەفورماسى تۋرالى» تاقىرىبىندا ميتينگى وتكىزۋ كەلىسىلگەن بولاتىن، دەپ حابارلايدى Almaty-akshamy.kz

الايدا 25 قاراشادا ۇيىمداستىرۋشى م. جيەمبايەۆتان اكىمدىككە جوعارىدا اتالعان ميتينگىنى وتكىزبەيتىندەرى تۋرالى حابارلاما ءتۇستى.

«حابارلامادا «جاس كاسىپقويلار قوعامى» رقب-نە جانە ميتينگىنىڭ تاقىرىبىنا قاتىسى جوق توپتار مەن ازاماتتار تاراپىنان ۇندەۋلەر تارالىپ جاتقانى ايتىلعان. وسىعان وراي، ۇيىمداستىرۋشىلار ارانداتۋشىلىققا جول بەرمەۋ ماقساتىندا ميتينگىنى وتكىزۋدەن ءوز ەرىكتەرىمەن باس تارتقانى حابارلاندى»، – دەلىنگەن اقپاراتتا.