قۇرىلتايدىڭ ءار ايماقتا ءوتۋ سول ءوڭىردىڭ دامۋىنا سەرپىن بەرەدى.
قازاقستان پرەزيدەنتى قاسىم-جومارت توقايەۆ ۇلتتىق قۇرىلتايدىڭ كەلەسى وتىرىسىن كيەلى تۇركىستاندا وتكىزۋدى ۇسىندى، دەپ حابارلايدى Almaty-akshamy.kz Baq.kz سىلتەمە جاساپ.
«ۇلتتىق قۇرىلتاي تۋرالى باستامانى قولداعاندارىڭىز ءۇشىن بارشاڭىزعا ريزاشىلىعىمدى بىلدىرەمىن. ءبىز بۇگىن قۇرىلتاي جۇمىسىنىڭ نەگىزگى باعدارىن ايقىندادىق. بۇل قۇرىلىم دەموكراتيا قۇندىلىقتارىن ورنىقتىرۋعا زور ۇلەس قوسارى ءسوزسىز. قۇرىلتاي جۇمىسى مۇنىمەن شەكتەلىپ قالمايدى. ءبىز جىل سايىن تۇراقتى تۇردە كەزدەسىپ تۇرامىز. قازاق دالاسىندا ەل تاعدىرى شەشىلگەن تاريحي ورىندار از ەمەس. ۇلىتاۋدان بولەك، ورداباسى، مارتوبە، كۇلتوبە سياقتى قاستەرلى جەرلەرىمىز بار. مەن كەلەسى باسقوسۋدى كيەلى تۇركىستاندا وتكىزۋدى ۇسىنامىن. قۇرىلتايدىڭ ءار ايماقتا ءوتۋ سول ءوڭىردىڭ دامۋىنا سەرپىن بەرەدى. ونىڭ مۇشەلەرى ءار جولى ءبىر ءوڭىردىڭ تىنىس-تىرشىلىگىمەن تانىسادى»، - دەپ اتاپ ءوتتى قاسىم-جومارت توقايەۆ.
سونىمەن قاتار ول الدىمىزدا اۋقىمدى جۇمىس تۇرعانىن ايتتى.
«الدىمىزدا اۋقىمدى جۇمىس بار. ەڭ باستىسى، ەلىمىزدە بەيبىتشىلىك پەن تۇراقتىلىق بولۋى كەرەك. ونسىز قازاقستاننىڭ وسىپ-وركەندەۋى مۇمكىن ەمەس. بەيبىتشىلىك پەن تۇراقتىلىقتىڭ وزەگى ەل بىرلىگى ەكەنىن ەستە ساقتايىق. حالقىمىز «بەرەكە باسى – بىرلىك» دەگەن. ءقازىر الەمدەگى احۋال قۇبىلمالى. ونى جاقسى بىلەسىزدەر. وسى كۇردەلى كەزەڭدە اۋىزبىرشىلىگىمىزدىڭ مىقتى بولۋى وتە ماڭىزدى. ءبىز قيىندىقتىڭ ءبارىن ىنتىماقتىڭ ارقاسىندا ەڭسەرىپ كەلەمىز. بولاشاقتا دا وسى جولدان تايماۋىمىز كەرەك. مەن حالقىمىزدىڭ جاسامپازدىق رۋحىنا كامىل سەنەمىن. قازاق ەلىنىڭ مارتەبەسى بيىكتەي بەرسىن!» - دەدى مەملەكەت باسشىسى.