جارنا قۇنى 2 125 تەڭگەدەن 3 000 تەڭگەگە دەيىن وسەدى.
قازاقستاندا 2022 جىلدان باستاپ ءمامس ءۇشىن جالاقىدان ۇستالاتىن قارجى مولشەرى كوبەيەدى، دەپ حابارلايدى Almaty-akshamy.kz
«كەلەر جىلى ەڭ تومەنگى جالاقى مولشەرى كوبەيەدى. سوعان سايكەس، ءمامس-تىڭ جارنا مولشەرلەمەسى دە 2 125 تەڭگەدەن 3 000 تەڭگەگە دەيىن وسەدى»، – دەدى الەۋمەتتىك مەديسينالىق ساقتاندىرۋ قورىنىڭ ءاقپاراتتىق-تۇسىندىرۋ جۇمىسى باسقارماسىنىڭ باسشىسى يرينا پودسكوچايا.
سپيكەردىڭ ايتۋىنشا، كەلەسى جىلى جۇمىس بەرۋشىلەردىڭ مامس-كە اۋدارىمدارىنىڭ مولشەرى 3%-عا دەيىن وسەدى. الايدا جارنالار جالاقىنىڭ 2% مولشەرىندە بۇرىنعىسىنشا جالاقىدان ۇستالاتىن بولادى.
«2022 جىلى ەڭ تومەنگى جالاقى مولشەرى 42 500 تەڭگەدەن 60 000 تەڭگەگە دەيىن كوبەيمەك. سوندىقتان ءمامس جارناسى دا 2 125 تەڭگەدەن 3 000 تەڭگەگە دەيىن وزگەرەدى (1 ەتج-دان 5%). وزگەرىستەر جك، اش يەلەرىنە جانە جەكە پراكتيكامەن اينالىساتىن تۇلعالارعا قاتىستى – 2 975 تەڭگەدەن 4 200 تەڭگەگە دەيىن (1،4 ەتج-دان 5%)»، – دەدى باسقارما باسشىسى.