ۇكىمەت ينۆەستيسيالاردى ىنتالاندىرۋ جانە ەكونوميكانى ءارتاراپتاندىرۋ جونىندەگى بەلگىلەنگەن جوسپارلاردى ىسكە اسىرۋدى جالعاستىرادى
بۇل تۋرالى ۇكىمەتتىڭ تەلەگرامم-كانالىندا جاريا ەتىلدى، دەپ حابارلايدى aqshamnews.kz.
«قازاقستاندا مۇناي-گاز حيمياسى، ماشينا جاساۋ، مەتاللۋرگيا جانە اوك جوعارى دەڭگەيدە قايتا وڭدەۋدىڭ 17 ءىرى جوباسىن ىسكە اسىرۋ باستالدى. ەكونوميكاعا ۇلكەن ينۆەستيسيالار قۇيىلۋدا. بيىل مەملەكەت باسشىسىنىڭ تۇرعىن ءۇي قۇرىلىسى، وڭىرلەردى گازداندىرۋ، تكش جاڭعىرتۋ، كولىك ينفراقۇرىلىمى بويىنشا اۋقىمدى باستامالارىن ىسكە اسىرۋ اياسىندا عانا ەكونوميكانى قارجىلاندىرۋ 2 ترلن تەڭگەدەن استى. وسى جىلى جالپى سوماسى 40 ترلن تەڭگەگە جۋىق ۇلتتىق ينفراقۇرىلىمدىق جوسپاردى 2029 جىلعا دەيىن ىسكە اسىرۋ باستالدى. جىل سوڭىنا دەيىن ەنەرگەتيكا جانە كوممۋنالدىق سەكتورلاردى جاڭعىرتۋ جونىندەگى ۇلتتىق جوبا قابىلدانادى. فەرمەرلەردى قولداۋ جالعاسۋدا. كەلەسى جىلى كوكتەمگى ەگىس جۇمىستارىن قارجىلاندىرۋ 700 ملرد تەڭگەگە دەيىن ۇلعايتىلدى. بۇگىنگى تاڭدا فەرمەرلەردەن وتىنىمدەر قابىلدانۋدا، ولار 5%-دىق جەڭىلدىگى بار قارجىلاندىرۋمەن قامتاماسىز ەتىلەدى»، — دەدى باسپا ءسوز ءماسليحاتىندا جۋرناليستەر سۇراعىنا جاۋاپ بەرگەن پرەمەر-مينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ.
سونىمەن قاتار ۇكىمەت ەكونوميكاعا شەتەل كاپيتالىن تارتۋ بويىنشا شارالاردى كۇشەيتتى. سونداي-اق بيزنەس ءۇشىن جاعدايدى جاقسارتۋ جانە ەكونوميكانى ىرىقتاندىرۋ بويىنشا جۇيەلى جۇمىس جالعاستىرىلادى. ۇكىمەتتىك باعدارلامالاردى ىسكە اسىرۋدان ەكونوميكاعا شەتەل ۆاليۋتاسىنىڭ ءتۇسۋى ۆاليۋتا نارىعىنا تۇراقتاندىرۋشى اسەر ەتەدى ءارى ەكونوميكانىڭ ودان ءارى وسۋىنە ىقپال ەتەدى دەپ كۇتىلۋدە.