بۇل تۋرالى ق ر پرەمەر-مينيستردىڭ ورىنباسارى – قارجى ءمينيسترى ەرۇلان جاماۋبايەۆتىڭ قاتىسۋمەن وتكەن «قارىزسىز قوعام» جوباسى بويىنشا اتقارىلعان جۇمىستار جانە الداعى جوسپارلاردى ىسكە اسىرۋ بارىسى تۋرالى كەڭەس بارىسىندا ايتىلدى، دەپ حابارلايدى Almaty-akshamy.kz.
«قۇجات اياسىندا اتالعان جۇمىسقا 9 مەملەكەتتىك ورگان، 12 بانك، قازاقستان قارجىگەرلەر قاۋىمداستىعى جانە ميكروقارجى ۇيىمدارى قاۋىمداستىعى قوسىلدى. ءقازىردىڭ وزىندە بارلىق وڭىرلەردە ازاماتتارعا كونسۋلتاسيالىق كومەك كورسەتۋ ءۇشىن «قارىزسىز قوعام» جوبالىق كەڭسەلەرى قۇرىلدى. جەرگىلىكتى اتقارۋشى ورگاندار ولاردى تەحنيكالىق قۇرالدارمەن جابدىقتاۋ شارالارىن قابىلداۋى قاجەت»، — قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ءبىرىنشى ورىنباسارى نۇرلان ءابدىراحمانوۆ باياندادى.
ماسەلەن، كەلەسى جىلى ەلىمىزدىڭ بارلىق وڭىرلەرىندە قارجىلىق ساۋاتتىلىق كۋرستارى ۇيىمداستىرىلىپ، 200 مىڭعا جۋىق ادامدى وقىتۋ جوسپارلانىپ وتىر. نەسيە مەرزىمى 90 كۇننەن اسىپ كەتكەن ازاماتتارعا باسىمدىق بەرىلمەك. سونىمەن قاتار، مەكتەپتەر مەن جوعارى وقۋ ورىندارىندا قارجىلىق ساۋاتتىلىق كۋرستارى وتكىزىلىپ، بارلىعى 1 ملن. ادام قامتىلادى. وسى ماقساتتا عىلىم جانە جوعارى ءبىلىم مينيسترلىگى 2024 جىلدان باستاپ ارنايى وقىتۋ كۋرسىن ەنگىزۋدى جوسپارلاۋدا.
وقۋ-اعارتۋ مينيسترلىگى «جاھاندىق قۇزىرەتتەر» ءپانى اياسىندا وقۋشىلاردىڭ قارجىلىق ساۋاتتىلىعىن ارتتىرۋدى ۇسىنىپ وتىر. بۇل تۋرالى AMANAT پارتياسىنىڭ حاتشىسى ەلدار جۇماعازييەۆ ايتتى.
«جاھاندىق قۇزىرەتتىلىك» وقۋلىعىندا بايانداۋ ءستيلى كۇردەلى جانە كەي تۇستارى تۇسىنىكسىز جازىلعان. وقۋشىلاردىڭ جاس ەرەكشەلىكتەرى مەن قىزىعۋشىلىقتارى ەسكەرىلمەگەن. سونىمەن قاتار، بۇل تاڭداۋ ءپانى رەتىندە سانالادى، ال قارجىلىق ساۋاتتىلىق بويىنشا الەمدىك رەيتينگتە جوعارى ورىندارعا يە ەلدەردە بۇل ءپان مىندەتتى پاندەر قاتارىندا (فينليانديا، جاپونيا). سونداي-اق، ءتۇرلى پاندەر بويىنشا قارجى ماسەلەسىنە بولىنەتىن ساعات سانى دا ءار مەكتەپتە ءارتۇرلى»، — دەدى ە.جۇماعازييەۆ.
قورىتىندىلاي كەلە، ەرۇلان جاماۋبايەۆ حالىق اراسىندا ءتۇسىندىرۋ جۇمىستارىن جۇرگىزۋدىڭ ماڭىزدىلىعىنا توقتالىپ، قارجى نارىعىن رەتتەۋ جانە دامىتۋ اگەنتتىگىنە AMANAT پارتياسىمەن، مۇددەلى مەملەكەتتىك ورگاندارمەن جانە ۇيىمدارمەن بىرلەسىپ، «جول كارتاسى» ءىس-شارالارىنىڭ ساپالى ورىندالۋىن قامتاماسىز ەتۋدى تاپسىردى. جەرگىلىكتى اتقارۋشى ورگاندار ازاماتتاردى وقىتۋعا جارامدى ءۇي-جايلاردى ءبولۋ، سونداي-اق ولاردىڭ تەحنيكالىق جابدىقتالۋىن قامتاماسىز ەتۋى قاجەت.