جەرگىلىكتى دەڭگەيدە اكىمدەردى سايلاۋ ينستيتۋتى كەزەڭ-كەزەڭىمەن ەنگىزىلىپ جاتىر.
2023 جىلدان باستاپ قاناتقاقتى رەجيمدە اۋداندار مەن وبلىستىق ماڭىزى بار قالالار اكىمدەرىن سايلاۋ وتكىزىلەدى. بۇل تۋرالى ادىلەت ۆيسە-مينيسترى الما مۇقانوۆا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇگىن ماجىلىستە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەت باسشىسىنىڭ 2022 جىلعى 16 ناۋرىزداعى جولداۋىن ىسكە اسىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تانىستىرىلدى. بۇل قۇجاتتا اتالعان سايلاۋعا قاتىستى ءتيىستى نورمالار ەسكەرىلگەن.
«وبلىستاردىڭ، رەسپۋبليكالىق ماڭىزى بار قالالاردىڭ، استانانىڭ اكىمدەرىن تاعايىنداۋ مەملەكەت باسشىسىنىڭ بالامالى نەگىزدە ءماسليحات قاراۋىنا كەمىندە ەكى كانديداتۋرا ۇسىنۋى ارقىلى جۇزەگە اسىرىلادى. سونىمەن قاتار، جەرگىلىكتى ءوزىن-وزى باسقارۋدى دامىتۋدىڭ 2025 جىلعا دەيىنگى تۇجىرىمداماسىنا سايكەس، جەرگىلىكتى دەڭگەيدە اكىمدەردى سايلاۋ ينستيتۋتى كەزەڭ-كەزەڭىمەن ەنگىزىلىپ جاتىر. بىلتىر اۋىلدار مەن كەنتتەر اكىمدەرىن سايلاۋ وتكىزىلدى. ال 2023 جىلدان باستاپ قاناتقاقتى رەجيمدە اۋداندار مەن وبلىستىق ماڭىزى بار قالالار اكىمدەرىن سايلاۋ وتكىزىلەتىن بولادى»، - دەدى ا. مۇقانوۆا زاڭ جوباسىن تانىستىرۋ بارىسىندا.
بۇدان بۇرىن حابارلانعانداي، بيىل 1 قىركۇيەكتە جاريالاعان جولداۋىندا پرەزيدەنت قاسىم-جومارت توقايەۆ بيىل كۇزدە كەزەكتەن تىس پرەزيدەنت سايلاۋىن وتكىزۋدى ۇسىندى.