بۇل تۋرالى قالا اكىمىنىڭ ورىنباسارى اسقار ءامرين 2024-2026 جىلدارعا ارنالعان مەگاپوليس بيۋدجەتىنىڭ جوباسى قارالعان الماتى ءماسليحاتىنىڭ كەزەكتەن تىس سەسسياسىندا حابارلادى.
ايتۋىنشا، بيىل 14،6 ملرد. تەڭگەگە 17،7 شاقىرىم جىلۋ جەلىسىن قايتا جاڭارتۋ جانە جوندەۋ جۇمىستارى جۇرگىزىلگەن. «قازترانسگاز ايماق» ينۆەستيسيالىق باعدارلاماسى بويىنشا 355 جەكە تۇرعىن ءۇيدى قامتيتىن 23،2 شاقىرىم گازبەن جابدىقتاۋ جەلىسىنىڭ قۇرىلىسى جۇرگىزىلىپ جاتىر.
«كەلەسى جىلى جەرگىلىكتى بيۋدجەت قاراجاتىنا 1،6 ملرد. تەڭگە كولەمىندە ناۋرىزباي اۋدانىندا گازبەن جابدىقتاۋدىڭ ماگيسترالدىق جەلىلەرىنىڭ قۇرىلىسى باستالادى. «Alma City»، «ەلىم-اي 4» سياقتى تۇرعىن ءۇي كەشەندەرىنىڭ جانە «ەليسەي الاڭدارى» كوتتەدج قالاشىعىنىڭ 3 مىڭ تۇرعىنى قامتىلادى»، - دەدى اسقار ءامرين.
ونىڭ ايتۋىنشا، 2024 جىلى 30 نىساندى قامتيتىن 5 قازاندىقتى (جۇلدىز، سولنەچنايا، تايىروۆ، مەدەۋ جانە كەمەل ش/ا.) قايتا جاڭارتۋ اياقتالادى. وعان 2،7 ملرد. تەڭگە بولىنەدى. كەلەسى جىلى 10،2 كم-دەن استام جىلۋ جەلىلەرىن قايتا جاڭارتۋ اياقتالادى. كەلەر جىلدىڭ بيۋدجەتىندە بۇل ماقساتتارعا 5،9 ملرد. تەڭگە قاراستىرىلعان.
سونىمەن قاتار، 2024 جىلى ناۋرىزباي اۋدانىندا ءتيىستى ينجەنەرلىك-كوممۋنيكاسيالىق ينفراقۇرىلىمى بار تۇرعىن ءۇي قۇرىلىسى جالعاسادى. وعان 12 ملرد. تەڭگە بولىنەدى