قازاقستاندا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى بەكىتىلدى، دەپ حابارلايدى Almaty-akshamy.kz.
ۇكىمەتتىڭ مالىمەتىنشە، ۇلتتىق جوبا اياسىندا 2023-2024 جىلدارى 655 مەديسينالىق-سانيتارلىق العاشقى كومەك (مساك) نىسانىن سالۋ جوسپارلانىپ وتىر. ونىڭ ىشىندە، 257 مەديسينالىق پۋنكت، 238 فەلدشەرلىك-اكۋشەرلىك پۋنكت جانە 160 دارىگەرلىك امبۋلاتوريا بار.
«بۇگىنگى تاڭدا 99 مساك نىسانىنىڭ قۇرىلىسى ءجۇرىپ جاتىر، بارلىعى بيىل تاپسىرىلماق. 2024-2025 جىلدارى ينسۋلت جانە كارديولوگيا ورتالىقتارى، تراۆماتولوگيالىق جانە ورتوپەديالىق بولىمشەلەرى بار، سونداي-اق زاماناۋي مەديسينالىق جابدىقتارمەن قامتىلعان 32 كوپسالالى ورتالىق اۋداندىق اۋرۋحانا جاڭعىرتىلاتىن بولادى»، - دەپ جازىلعان اقپاراتتا.
كادرلىق قامتاماسىز ەتۋ بويىنشا 2023-2025 جىلدار ارالىعىندا ەلىمىزدىڭ مەديسينالىق كوللەدجدەرى مەن جوعارى وقۋ ورىندارىندا 14 000-نان استام مەدبيكە، 10 000 فەلدشەر، 957 اكۋشەر جانە 7 000 جالپى پراكتيكا دارىگەرىن دايارلاۋ جوسپارلانىپ وتىر.
كوپسالالى ورتالىق اۋداندىق اۋرۋحانالاردى جاڭا جابدىقتارمەن قامتاماسىز ەتۋ ماقساتىندا 2025 جىلعا دەيىن جالپى سوماسى 46 ملرد تەڭگەگە 965 مەديسينالىق تەحنيكا ساتىپ الۋ جوسپارلانعان. ولاردىڭ قاتارىندا كومپيۋتەرلىك توموگرافيا اپپاراتتارىنان باستاپ وكپەنى جاساندى جەلدەتۋ اپپاراتتارىنا دەيىن ءتۇرلى جابدىقتار بولماق.