يادرولىق قارۋى بار مەملەكەتتەر يادرولىق سىناقتاردان باس تارتۋ جونىندەگى مىندەتتەمەلەرىن راستاۋى كەرەك. يادرولىق سىناقتارعا جاپپاي تىيىم سالۋ شارتى ۇيىمىنىڭ اتقارۋشى حاتشىسى روبەرت فلويد وسىلاي دەپ مالىمدەدى، دەپ حابارلايدى Almaty-akshamy.kz 24.kz-كە سىلتەمە جاساپ
نيۋ-يوركتە وتكەن بۇۇ باس اسسامبلەياسىنىڭ حالىقارالىق يادرولىق سىناقتارعا قارسى ءىس-قيمىل كۇنىنە ارنالعان جوعارى دەڭگەيدەگى پلەنارلىق وتىرىسى ءوتتى. بۇل جيىن قازاقستان باستاماسىمەن بۇۇ-نىڭ تورىندە جىل سايىن تامىزدىڭ 29 وتەدى. قازاقستان سەمەي پوليگونىن جاۋىپ قانا قويماي، يادرولىق سىناقتارعا جاپپاي تىيىم سالۋ تۋرالى شارتتىڭ كۇشىنە ەنۋىنە تىكەلەي ىقپال ەتتى. الەم بويىنشا ۇلكەن قوزعالىسقا نەگىز بولدى. سوندىقتان بۇۇ باس اسسامبلەياسىنىڭ ءتوراعاسى چابا كەرەشي ەلىمىزدىڭ ءرولىن ەرەكشە اتاپ ءوتتى.
روبەرت فلويد، يادرولىق سىنىقتارعا جاپپاي تىيىم سالۋ شارتى ۇيىمىنىڭ اتقارۋشى حاتشىسى: - بۇل كۇللى ادامزات ءۇشىن ماڭىزدى كۇن. قازاقستان بۇل كۇننىڭ بۇۇ-نىڭ كۇنتىزبەسىنە ەنۋىنە تىكەلەي ىقپال جاسادى. بۇل الەمدى يادرولىق قارۋدى سىناۋدان جانە تۇتەپ كەلگەندە يادرولىق قارۋدان مۇلدەم باس تارتۋعا شاقىراتىن كۇن. الەم ەلدەرى ناقتى قادامدار جاساۋى ءتيىس.
جارىسا قارۋلانعان الپاۋىتتار اراسىنداعى قارىم-قاتىناستىڭ شيەلەنىسۋى يادرولىق قارۋدىڭ الەم ءۇشىن ءقاۋىپىن ارتتىرا ءتۇستى. سوندىقتان بۇۇ باس اسسامبلەياسى ءتوراعاسىنىڭ ايتۋىنشا، جاھاندىق يادرولىق سىناقتارعا تىيىم سالۋدى جۇزەگە اسىرۋ بويىنشا بىرلەسكەن ءىس-قيمىلداردى ارتتىرۋ كەرەك. بۇل ورايدا، بۇۇ-نىڭ قارۋسىزدانۋ ىستەرى جونىندەگى جوعارى وكىلى يزۋمي ناكاميسۋ الەم ەلدەرى قازاقستاننان ۇلگى الۋى ءتيىس دەيدى.
يزۋمي ناكاميسۋ، بۇۇ قارۋسىزداندىرۋ ىستەرى جونىندەگى جوعارى وكىلى: - سەمەي يادرولىق سىناق پوليگونىن جابۋ – تاريحي ماڭىزدى شەشىم. قازىرگى يادرولىق قارۋدى سىناۋعا قارسى حالىقارالىق قوزعالىسقا مۇرىندىق بولدى. قازاقستان بۇل سالاداعى كوشباسشىلىق ءرولى ارقىلى بىزگە اركەز يادرولىق قارۋدان ازات الەم قۇرۋداعى بىرلەسكەن ءىس-قيمىلداردى كۇشەيتۋ كەرەگىن ەسكە سالىپ وتىرادى. بۇل كوشباسشىلىقتى حالىقارالىق قاۋىمداستىق جوعارى باعلايدى جانە بۇۇ قازاقستان ۇكىمەتىنىڭ ارىپتەستىگى مەن قولداۋىنا ريزاشىلىق بىلدىرەدى.
الەمدى يادرولىق قارۋدان باس تارتۋ ءۇشىن تاعى دا ديالوگ پەن ناقتى ارەكەتتەرگە شاقىرعان قازاقستاننىڭ بۇۇ جانىنداعى تۇراقتى وكىلى اقان راحمەتۋللين يادرولىق قارۋسىز الەمگە قول جەتكىزۋ ءۇشىن مەملەكەتتەردەن بولەك، قوعام وكىلدەرىنىڭ، سونىڭ ىشىندە جاستاردىڭ كۇش-جىگەرىن بىرىكتىرۋ كەرەك دەيدى.
ال جاھاندىق باستاماعا نازار اۋدارۋ ماقساتىندا قازاقستاننىڭ تۇراقتى وكىلدىگى مەن بۇۇ-نىڭ قارۋسىزدانۋ جونىندەگى باسقارماسى بىرلەسىپ، تامىزدىڭ 29-ىن بىلدىرەتىن 8،29 شاقىرىم قاشىقتىقتى ەڭسەرۋ اكسياسىن ۇيىمداستىردى. بۇل شاراعا اتاقتى گولليۆۋد اكتەرى مايكل دۋگلاس تا قوسىلىپ، ەلىمىز بەن بۇۇ-نىڭ وسى باعىتتاعى كۇش-جىگەرىنە قولداۋ بىلدىرەدى.