ءمامس جارناسىن قالاي تولەيمىز؟
كەلەسى جىلدان باستاپ ءبىرىڭعاي جيىنتىق تولەم (بجت) الىنىپ تاستالادى. ءوزىن-وزى جۇمىسپەن قامتىعان ازاماتتار الداعى ۋاقىتتا ءمامس تولەمدەرىن قالاي تولەيدى؟ بۇل مەديسينالىق ساقتاندىرۋ قورىنىڭ شەشىمى مە؟ وسى جانە وزگە دە ساۋالدارعا مسق الماتى فيليالىنىڭ ديرەكتورى تىلەۋحان ابىلدايەۆ جاۋاپ بەردى.
بجت قاشان جانە قانداي ماقساتپەن ەنگىزىلدى؟
جالپى، ءبىرىڭعاي جيىنتىق تولەم (بجت) اۋەلدە جەكە كاسىپكەر رەتىندە تىركەلمەگەن، ءوزىن-وزى جۇمىسپەن قامتىعان ازاماتتار ءۇشىن 5 جىلعا (2019 جىلدىڭ 1 قاڭتارىنان 2023 جىلدىڭ 1 قاڭتارىنا دەيىن) ۋاقىتشا ەنگىزىلگەن بولاتىن. بۇگىنگى كۇنگە دەيىن تولەمنىڭ بۇل ءتۇرىن جەكە قوسالقى شارۋاشىلىق ونىمدەرىن ساتاتىن جانە وزگە جەكە تۇلعالارعا قىزمەتتەر كورسەتەتىن، جىلدىق تابىسى 1175 ايلىق ەسەپتىك كورسەتكىشتەن اسپايتىن ازاماتتار، جۇمىسسىزدار، بالا كۇتىمى بويىنشا ءبىر جارىم جاسقا دەيىنگى الەۋمەتتىك تولەمدەردى العىسى كەلگەن جۇكتى ايەلدەر پايدالانىپ كەلدى.
• ءبىرىڭعاي جيىنتىق تولەم رەسپۋبليكالىق جانە وبلىستىق ماڭىزى بار قالا تۇرعىندارى ءۇشىن ءبىر ايلىق ەسەپتىك كورسەتكىش كولەمىن جانە باسقا ەلدى مەكەندەردىڭ ازاماتتارى ءۇشىن 0،5 اەك قۇرايدى. ياعني، بيىل بجت مولشەرى تيىسىنشە 3 450 تەڭگە جانە 1725 تەڭگە.
«ءبىرىڭعاي جيىنتىق تولەمنىڭ نەگىزگى جانە جالعىز ماقساتى – ءوزىن-وزى جۇمىسپەن قامتىعان ازاماتتاردى مىندەتتى الەۋمەتتىك مەديسينالىق ساقتاندىرۋ، الەۋمەتتىك ساقتاندىرۋ جانە زەينەتاقىمەن قامسىزداندىرۋ جۇيەلەرىنە تارتۋ. سوندىقتان بۇل تولەمدەرى تومەن جەڭىلدىك كەزەڭى بولدى. ءقازىر جەكە تۇلعالاردىڭ تابىسىن دەكلاراسيالاۋ كەزەڭ-كەزەڭىمەن ەنگىزىلۋ ۇستىندە. بۇرىن كاسىبىن تىركەمەگەن ازاماتتار كاسىپكەر رەتىندە تىركەلىپ نەمەسە جالدامالى قىزمەتكەر بولىپ جۇمىس ىستەۋى كەرەك»، – دەدى تىلەۋحان ابىلدايەۆ.
كەلەسى جىلى بجت ورنىنا باسقا تولەم ءتۇرى ەنگىزىلە مە؟
بۇعان دەيىن بجت تولەپ كەلگەن ازاماتتار 2024 جىلدان باستاپ ساقتاندىرۋ جۇيەسىنە دەربەس تولەۋشى رەتىندە قاتىسا الادى. تولەم سوماسى 1 ەڭ تومەنگى جالاقىنىڭ 5 پروسەنتىن قۇرايدى. (2023 جىلى – 3500 تەڭگە). اتاپ ايتار بولساق، بۇرىن ساقتاندىرۋ ستاتۋسىن الۋ ءۇشىن وتكەن 12 ايدىڭ قارىزىن وتەۋ قاجەت بولاتىن. ءقازىر ءوزىن-وزى ساقتاندىرعىسى كەلەتىن، رەسمي جۇمىس ىستەمەيتىن ازامات بۇرىنعى بەرەشەكتى وتەمەي، الداعى 12 ايعا جارنا تولەپ، ءبىر جىلعا ساقتاندىرۋ ستاتۋسىن الا الادى. ماسەلەن، وسى ايدا مەدكومەككە جۇگىنەتىن پاسيەنت 2023 جىلدىڭ شىلدەسىنەن 2024 جىلدىڭ ماۋسىمىنا دەيىنگى ارالىق ءۇشىن جارنا اۋدارا الادى.
تىلەۋحان ابىلدايەۆتىڭ ايتۋىنشا، تۇراقتى تابىسى جوق اۋىل تۇرعىندارىنىڭ (90 مىڭعا جۋىق ادام) ءمامس جۇيەسىنەن تىس قالۋ ءقاۋپى بار. ءقازىر وسىعان بايلانىستى اۋىلدىق ايماقتاردا ءتۇسىندىرۋ جۇمىستارى جۇرگىزىلىپ جاتىر.
ازىرشە، ازاماتتار الداعى جارتى جىلدا بجت-نى تولەي بەرەدى. 2024 جىلدان باستاپ تولەمنىڭ جوعارىدا ايتىلعان تۇرلەرىن قاراستىرۋ قاجەت بولماق.
تولەم قازاقستاننىڭ ەكىنشى دەڭگەيلى بانكتەرى، بانكتەردىڭ ءموبيلدى قوسىمشالارى مەن «قازپوشتا» بولىمشەلەرى ارقىلى قابىلدانادى. تولەم جاساۋ ءۇشىن جەكە سايكەستەندىرۋ ءنومىرىن، تولەم جاسالاتىن ايدى كورسەتۋ قاجەت.
ءمامس جۇيەسىنە قاتىستى قوسىمشا سۇراقتار بويىنشا ەمحاناداعى «پاسيەنتتەردى قولداۋ قىزمەتىنە» جۇگىنۋگە بولادى. سونىمەن قاتار، قوردىڭ تومەندەگى بايلانىس ارنالارى ارقىلى ءوتىنىم قالدىرا الاسىز:
- fms.kz رەسمي سايتى،
- Qoldau 24/7 ءموبيلدى قوسىمشاسى
- Telegramداعى SaqtandyrýBot
- 1414 ءبىرىڭعاي بايلانىس ورتالىعى.