مەملەكەت باسشىسىنىڭ تاپسىرماسىمەن ق ر وقۋ-اعارتۋ مينيسترلىگى مەن اقتوبە وبلىسىنىڭ اكىمدىگى «سيفرلىق تەحنولوگيالاردى پايدالانىپ اقتوبە وبلىسىنداعى شاعىن جيناقتى اۋىل مەكتەپتەرىنىڭ الەۋەتىن دامىتۋ» پيلوتتىق جوباسىن جۇزەگە اسىرۋدا. جۋىردا وبلىس ورتالىعىندا وتكەن رەسپۋبليكالىق سەميناردا اتالعان جوبانىڭ قورىتىندىلارى تالقىلاندى، دەپ حابارلايدى aqshamnews.kz.
جالپى پيلوتتىق جوبا اقتوبە وبلىسى بويىنشا 10،5 مىڭنان استام وقۋشى ءبىلىم الاتىن 134 شاعىن جيناقتى مەكتەپتى قامتيدى. تىرەك مەكتەپتەردىڭ وقىتۋشىلارى ساباق بەرۋدە ستريمينگتىك وقىتۋدىڭ سيفرلىق شەشىمدەرىن قولداندى. جوبا ناتيجەسىندە مەكتەپتەردە ونلاين وقىتۋ ءۇشىن جاڭارتىلعان سيفرلىق كابينەتتەر جانە لابوراتوريالىق جۇمىستار ءۇشىن عىلىم كابينەتتەرى اشىلدى، 1000-نان استام پەداگوگ «ورلەۋ» بىلىكتىلىكتى ارتتىرۋ ۇلتتىق ورتالىعى ازىرلەگەن ەكى ءبىلىم بەرۋ باعدارلاماسى بويىنشا وقىدى. ى.التىنسارين اتىنداعى ۇلتتىق ءبىلىم اكادەمياسى عىلىمي-ادىستەمەلىك سۇيەمەلدەۋدى جۇزەگە اسىردى.
«وقۋ-اعارتۋ مينيسترلىگى اۋىلدىق جانە شاعىن جيناقتى مەكتەپتەردى دامىتۋ بويىنشا جۇيەلى جۇمىستار جۇرگىزۋدە. سەگىز مىڭ مەكتەپتىڭ 67،4%-ى اۋىلدىق جەرلەردە، 51،2%-ى شاعىن جيناقتى بولىپ تابىلادى. ولاردىڭ باسىم بولىگى سولتۇستىك قازاقستان، قوستاناي، اقمولا، پاۆلودار، باتىس قازاقستان جانە اقتوبە وبلىستارىندا ورنالاسقان. اقتوبە وبلىسىندا جۇزەگە اسىرىلعان پيلوتتىق جوبانىڭ ناتيجەسىندە اۋىل مەكتەپتەرىندە ءبىلىم ساپاسى پەن وقىتۋ تيىمدىلىگىنىڭ ايتارلىقتاي ارتقانىن بايقاپ وتىرمىز. بۇل جوبا جوعارىدا اتالعان وڭىرلەردە 2025-2026 جىلداردا جۇزەگە اسىرىلادى»، - دەپ اتاپ كورسەتتى وقۋ-اعارتۋ ءبىرىنشى ۆيسە-مينيسترى ناتاليا جۇمادىلدايەۆا.
اتاپ ءوتۋ كەرەك، جوبانى جۇزەگە اسىرۋ كەزىندە مەكتەپتەردىڭ 77،4%-دا جوعارى جىلدامدىقتى ينتەرنەتكە قوسۋ جانە پەداگوگيكالىق كادرلار تاپشىلىعى ماسەلەسى شەشىمىن تاپتى. جوبا «قازاقستان حالقىنا» قورىنىڭ، ءبىلىم بەرۋدى تۇراقتى دامىتۋ قورىنىڭ قولداۋىمەن اقتوبە وبلىسىنىڭ اكىمدىگىمەن بىرلەسىپ ق ر وقۋ-اعارتۋ مينيسترلىگىنىڭ باستاماسىمەن جۇزەگە اسىرىلدى.