ەلىمىزگە جۇمىس ىستەۋگە كەلەتىن ميگرانتتاردىڭ سانى ازايتىلادى
ەڭبەك جانە حالىقتى الەۋمەتتىك قورعاۋ مينيسترلىگى «قازاقستان اۋماعىنا شەتەلدىك جۇمىس كۇشىن تارتۋعا 2023 جىلعا ارنالعان كۆوتانى بەلگىلەۋ» تۋرالى بۇيرىقتى جاريالادى، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
قۇجاتتا كەلەر جىلى شەتەلدىكتەردى جۇمىسقا تارتۋ ءۇشىن بولىنەتىن كۆوتا سانى قىسقاراتىنى كورسەتىلگەن.
«قازاقستان اۋماعىندا ەڭبەك قىزمەتىن جۇزەگە اسىرۋ ءۇشىن شەتەلدىك جۇمىس كۇشىن تارتۋعا 2023 جىلعا ارنالعان كۆوتا جەرگىلىكتى اتقارۋشى ورگان جۇمىس بەرۋشىلەرگە بەرەتىن رۇقسات بويىنشا 0،24% مولشەرىندە بەلگىلەنسىن. ەڭبەكشى كوشىپ كەلۋشىلەردى جۇمىسقا تارتۋ 3،2% مولشەرىندە بەكىتىلسىن»، - دەپ جازىلعان اشىق تالقىعا شىعارىلعان بۇيرىقتا.
بيىل شەتەلدىكتەرگە بولىنگەن كۆوتا مولشەرى – 0،31 پايىز بولدى. 2023 جىلى مينيسترلىك كۆوتانىڭ بۇل ءتۇرىن 0،07 پايىزعا قىسقارتۋدى جوسپارلاپ وتىر.
بۇيرىقتى اشىق تالقىلاۋ 30 قاراشاعا دەيىن جالعاسادى.