كەلەر جىلى الماتى ۇستازدارى مەن مۇعالىمدەرىنىڭ جالاقىسى وسەدى

32-33 مىڭ ءمۇعالىمنىڭ جالاقىسى 25 پايىزعا ارتادى.

الماتى قالاسى اكىمىنىڭ ورىنباسارى اسەم ءنۇسىپوۆا قالالىق ءماسليحاتتىڭ وتىرىسىندا كەلەسى جىلى مۇعالىمدەر مەن دارىگەرلەردىڭ جالاقىسى كوتەرىلەتىنىن ايتتى، دەپ حابارلايدى Almaty-akshamy.kz.

«كەلەسى جىلى مۇعالىمدەر مەن مەديسينا قىزمەتكەرلەرىنىڭ ەڭبەكاقى قورى 170 ملرد تەڭگەنى قۇرايدى. 32-33 مىڭ ءمۇعالىمنىڭ جالاقىسى 25 پايىزعا ارتادى، بۇل ءۇشىن قالا بيۋدجەتىنەن 73 ميلليارد تەڭگە قاراستىرىلعان. 2022 جىلى مۇعالىمدەردىڭ ورتاشا جالاقىسى 250-255 مىڭ تەڭگەنى قۇراسا، 2023 جىلى بۇل كورسەتكىش 320 مىڭ تەڭگەگە دەيىن وسەدى»، - دەدى ول.

كەلەر جىلى كىتاپحاناشىلاردىڭ، تەحنيكالىق قىزمەتكەرلەردىڭ جانە باسقا دا ءبىلىم بەرۋ سالاسى قىزمەتكەرلەرىنىڭ جالاقىسىن 22 پايىزعا ارتتىرۋ قاراستىرىلىپ، وعان 9 ميلليارد تەڭگە قاراستىرىلعان.

«بىلىكتىلىگىن ارتتىرعانىن راستاعان 19 مىڭعا جۋىق ءمۇعالىم قوسىمشا اقى الادى. بۇل ءۇشىن قوسىمشا 25 ملرد تەڭگە ءبولىندى»، - دەپ قوستى اسەم ءنۇسىپوۆا.

سونداي-اق ول ءماسليحات دەپۋتاتتارىنا كەلەسى جىلى جالاقىنىڭ كوتەرىلۋى دەنساۋلىق ساقتاۋ سالاسىنىڭ قىزمەتكەرلەرىنە دە اسەر ەتەتىنىن جەتكىزدى.

«دارىگەرلەردىڭ ەڭبەكاقىسى 30 پايىزعا، مەدبيكەلەردىڭ ەڭبەكاقىسى 20 پايىزعا، كىشى مەديسينا قىزمەتكەرلەرىنىڭ ەڭبەكاقىسى 18 پايىزعا ارتادى. 2023 جىلى دارىگەرلەردىڭ ورتاشا جالاقىسى شامامەن 350 مىڭ تەڭگەنى، مەدبيكەلەردىكى 205 مىڭ تەڭگەنى قۇرايدى»، - دەپ تۇيىندەدى ول.