جوسپار جوباسى 24 زاڭ جوباسىن ازىرلەۋدى كوزدەيدى.
قازاقستاننىڭ ادىلەت ءمينيسترى قانات مۋسين ۇكىمەتتىڭ 2023 جىلعا ارنالعان زاڭ جوبالاۋ جوسپارىنىڭ جوباسىن تانىستىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ادىلەت مينيسترلىگى مەملەكەتتىك ورگانداردىڭ ۇسىنىستارىمەن ۇكىمەتتىڭ زاڭ جوبالاۋ جۇمىستارىنىڭ 2023 جىلعا ارنالعان جوسپارى جوباسىن دايىندادى. ونى بيىلعى 15 قىركۇيەكتە زاڭ جوبالاۋ قىزمەتى جونىندەگى ۆەدومستۆوارالىق كوميسسياسى ماقۇلدادى»، - دەدى مينيستر بۇگىنگى ۇكىمەت وتىرىسىندا.
باستاپقىدا جوسپار جوباسىندا پارلامەنتكە 34 زاڭ جوباسىن ازىرلەۋ جانە ەنگىزۋ قاراستىرىلعان. كەيىنىرەك جوسپار جوباسى پرەزيدەنت اكىمشىلىگىنىڭ ەسكەرتۋلەرىمەن پىسىقتالدى.
اتاپ ايتقاندا، زاڭ جوبالارىن پارلامەنتكە ەنگىزۋ مەرزىمدەرى قايتا قارالدى، سونداي-اق تۇجىرىمدامالارى ءتيىستى تالقىلاۋدى تالاپ ەتەتىن ءبىرقاتار باستاما الىنىپ تاستالدى.
«سونىمەن قاتار ورتالىقسىزداندىرۋ بويىنشا قوسىمشا 2 زاڭ جوباسى ەنگىزىلدى. باياندالعاندى ەسكەرە وتىرىپ، پىسىقتالعان جوسپار جوباسى 24 زاڭ جوباسىن ازىرلەۋدى كوزدەيدى، ونىڭ ىشىندە پارلامەنتكە ءبىرىنشى جارتىجىلدىقتا – 13 زاڭ جوباسىن، ەكىنشى جارتىجىلدىقتا – 11 زاڭ جوباسىن ەنگىزۋ جوسپارلانىپ وتىر. جەكەلەگەن زاڭ جوبالارى ۆەدومستۆوارالىق كوميسسيا ماقۇلداعاننان كەيىن جوسپار جوباسىنا ەنگىزىلەدى. مىسالى، بيۋدجەت كودەكسى، قالا قۇرىلىسى كودەكسى، ماسس-مەديا ماسەلەرى جونىندەگى زاڭ جوباسى جانە باسقالار»، - دەپ ءتۇسىندىردى ادىلەت ءمينيسترى.