ەل ۇكىمەتىنىڭ 2021 جىلعى 5 قاراشاداعى قاۋلىسىنا سايكەس، 2023 جىلدىڭ 1 قاڭتارىنان باستاپ شەتەلدىكتەردەن تۋريستىك جارنا الىنادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«شەتەلدىكتەر ءۇشىن تۋريستىك جارنا تۋريستەردەن قالالار مەن اۋداندارداعى حوستەلدەردى، قوناقجايلاردى، جالعا بەرىلەتىن تۇرعىن ۇيلەردى قوسپاعاندا، تۋريستەردى ورنالاستىرۋ ورىندارىندا بولاتىن ءاربىر تاۋلىك ءۇشىن الىنادى»، - دەلىنگەن ۇكىمەت قاۋلىسىندا.
تۋريستەر كەلەتىن ورىنداردا شەتەلدىكتەردەن الىناتىن جارنالارعا مىنا مولشەرلەمەلەر قولدانىلادى:
- 2022 جىلعى 1 قاڭتاردان باستاپ 31 جەلتوقساندى قوسا العاندا – تۇرۋ قۇنىنىڭ 0%-ى؛
- 2023 جىلعى 1 قاڭتاردان باستاپ – تۇرۋ قۇنىنىڭ 5%-دان اسپايتىن مولشەرى.
قاۋلىعا ساي، تۋريستىك جارنا مولشەرلەمەسىن جەرگىلىكتى اتقارۋشى ورگاندار بەلگىلەيدى. سايكەسىنشە، قاراجات جەرگىلىكتى بيۋدجەتكە تۇسەدى. بۇل رەتتە تۋريستىك الىم سوماسى ءومىر ءسۇرۋ قۇنىنا قوسىلمايدى.
2023 جىلدىڭ 1 قاڭتارىنان باستاپ شەتەلدىكتەر ءۇشىن مىناداي تاريفتەر قولدانىلماق:
- استانا قالاسى - 5%؛
- شۋ اۋدانى (جامبىل وبلىسى) - 0%؛
- ورداباسى اۋدانى (تۇركىستان وبلىسى) - 0%؛
- جەتىساي اۋدانى (تۇركىستان وبلىسى) - 0%؛
- سارىاعاش اۋدانى (تۇركىستان وبلىسى) - 0%؛
- شاردارا اۋدانى (تۇركىستان وبلىسى) - 5%؛
- رۋدنىي قالاسى (قوستاناي وبلىسى) - 5%؛
- قارابالىق اۋدانى (قوستاناي وبلىسى) - 1%.
شەتەلدىكتەر ءۇشىن قويىلاتىن جارنا مولشەرلەمەسى اعىمداعى ستاتيستيكالىق دەرەكتەرگە نەمەسە ماۋسىمعا بايلانىستى سارالانادى. ياعني، تۋريستەر قوناقۇيدە جارتى كۇن تۇرسا، تۋريستiك الىم تولىق كۇنگە الىنادى.
تۋريستىك الىمدى تۋروپەراتورلار شەتەلدىك تۋريستەردى ورنالاستىرۋ ورىندارىندا تىركەۋ كەزىندە ولاردىڭ جەكە باسىن كۋالاندىراتىن قۇجاتتاردى كورسەتكەن كەزدە الادى. ءقوناقۇي قىزمەتكەرلەرى مەن تۋروپەراتورلار تۋريستەرگە ءاربىر كۇن ءۇشىن تۋريستىك جارنا الىناتىنىن ەسكەرتۋى ءتيىس. ونى تولەگەن شەتەلدىك ازاماتقا جارنانى وتەگەنىن راستايتىن انىقتاما بەرىلەدى.