بولاشاق زەينەتكەرلەر ءۇشىن 2024 جىلدىڭ 1 قاڭتارىنان باستاپ جۇمىس بەرۋشىلەر تاراپىنان قوسىمشا زەينەتاقى جارنالارى تولەنەدى.
بۇل تۋرالى ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«زەينەتاقى مولشەرىن ارتتىرۋ جانە جۇيەنىڭ قارجىلىق تۇراقتىلىعىن قامتاماسىز ەتۋ ءۇشىن جىل باسىندا بازالىق جانە ەڭبەك زەينەتاقىلارىنىڭ مولشەرىن ەسەپتەۋ پارامەترلەرى وزگەرتىلدى. سارالاپ كوتەرۋ تەتىگىن قولدانۋ ناتيجەسىندە ەڭ تومەنگى بازالىق زەينەتاقى مولشەرى 21 پايىزعا دەيىن ءوستى. بۇل زەينەتاقىسى تومەن زەينەتكەرلەرگە ۇلكەن الەۋمەتتىك قولداۋ بولدى. ال بولاشاق زەينەتكەرلەر ءۇشىن 2024 جىلدىڭ 1 قاڭتارىنان باستاپ جۇمىس بەرۋشىلەر تاراپىنان قوسىمشا زەينەتاقى جارنالارى تولەنەدى»، – دەدى مينيستر.
ونىڭ اتاپ وتۋىنشە، الەۋمەتتىك كودەكستە بجزق سالىمشىسى ءوزىنىڭ زەينەتاقى اكتيۆتەرىنىڭ 50 پايىزدان اسپايتىن بولىگىن دەربەس تاڭداۋى بويىنشا جەكە باسقارۋشى ينۆەستيسيالىق كومپانيالارعا بەرۋ مۇمكىندىگى كوزدەلگەنىن ايتادى.
«جىل باسىنان باستاپ قولدانىسقا ەنگىزىلگەن وتباسىنىڭ سيفرلىق كارتاسى پرواكتيۆتى قىزمەت كورسەتۋ قۇرالى رەتىندە تولىققاندى جۇمىس ىستەپ تۇر. ەسەپتى كەزەڭدە 800 مىڭنان استام ازاماتقا پرواكتيۆتى قولداۋ شارالارىن ۇسىنۋعا SMS جولدادى. ونىڭ ىشىندە 650 مىڭ ازاماتقا تولەمدەر پرواكتيۆتى تۇردە، 95 مىڭ ازاماتقا «ازاماتتارعا ارنالعان ۇكىمەت» مەملەكەتتىك كورپوراسياسى ارقىلى تاعايىندالدى»، - دەدى تامارا دۇيسەنوۆا.