مەسسەندجەرلەر مەن الەۋمەتتىك جەلىلەردە تاراتىلىپ جاتقان ق ر پرەزيدەنتىنىڭ جارلىعىمەن 2023 جىلعى 1 قاڭتاردان باستاپ ايەلدەردىڭ زەينەتكە شىعۋ جاسى 58 جاسقا دەيىن تومەندەيتىنى، سونداي-اق قازاقستاندا 13ء-شى زەينەتاقى تولەمى ەنگىزىلەتىنى تۋرالى اقپارات شىندىققا جاناسپايدى، دەپ حابارلايدى Almaty-akshamy.kz.
ايتا كەتەيىك، مەملەكەت باسشىسىنىڭ 1 قىركۇيەكتەگى قازاقستان حالقىنا جولداۋىندا ايتىلعانداي، 2023 جىلعى 1 قاڭتاردان باستاپ ايەلدەردىڭ زەينەت جاسىن كەزەڭ-كەزەڭىمەن ارتتىرۋ 5 جىل مەرزىمگە 61 جاس دەڭگەيىندە توقتاتىلادى.
«زەينەتاقى تولەمدەرىنە قاتىستى قولدانىستاعى زاڭناماعا سايكەس ازاماتتاردى زەينەتاقىمەن قامسىزداندىرۋ بازالىق جانە ىنتىماقتى زەينەتاقى، سونداي-اق ازاماتتاردىڭ مىندەتتى زەينەتاقى جارنالارىن اۋدارۋ ەسەبىنەن قالىپتاستىرىلاتىن ءبىرىڭعاي جيناقتاۋشى زەينەتاقى قورىنان تولەم بەرۋ ارقىلى جۇزەگە اسىرىلاتىنىن حابارلايمىز» دەپ ءمالىم ەتتى ەڭبەك جانە حالىقتى الەۋمەتتىك قورعاۋ مينيسترلىگىنەن.
2022 جىلعى 1 قاراشاداعى جاعداي بويىنشا ەلدەگى زەينەتكەرلەر سانى – 2 ملن 268 مىڭ ادام.
2022 جىلعى 1 قاراشاداعى جاعداي بويىنشا زەينەتاقى تولەمدەرىنىڭ ورتاشا مولشەرى (بازالىق جانە ىنتىماقتى زەينەتاقى) 108 993 تەڭگەنى قۇرادى (بجزق تولەمدەرىن ەسەپكە الماعاندا).
«ازاماتتاردان فەيكتەرگە نازار اۋدارماۋدى جانە اقپاراتتى تەك رەسمي دەرەككوزدەن الۋدى سۇرايمىز. ەستەرىڭىزگە سالا كەتەيىك، جالعان اقپارات تاراتۋ زاڭمەن جازالانادى» دەپ ەسكەرتەدى ۆەدومستۆودان.