ەلىمىزدە يود، كورۆالول، مەنوۆازين، بريلليانت جاسىلى مەن ۆالەريانا سىعىندىسى قىمباتتاۋى مۇمكىن.
ويتكەنى جاڭا جىلدان باستاپ وسى دارى-دارمەكتىڭ قۇرامىنا كىرەتىن ەتيل سپيرتىنە اكسيز سالىعى سالىنادى. بۇل تۋرالى اlmaty-akshamy.kz حابارلايدى كتك ارناسىنا سىلتەمە جاساپ.
"اتامەكەن" ۇكپ مەديسينالىق قىزمەت دەپارتامەنتىنىڭ باسقارۋشى ديرەكتورى نازگۇل قابدىراحمانوۆانىڭ بولجاۋىنشا، ءقازىر تيىن-تەبەن تۇراتىن بۇل پرەپاراتتاردىڭ باعاسى 30، ءتىپتى 100 پايىزعا وسەدى.
25 ميلليليتر قۇتىسى 100-200 تەڭگە ارالىعىندا ساتىلاتىن يود، سول ارالىقتا تۇراتىن كورۆالول تامشىلارى ەندى ەكى ەسە قىمباتتاپ شىعا كەلۋى مۇمكىن. ويتكەنى مەديسينالىق تازا ءسپيرتتىڭ ليترىنە سالىناتىن اكسيز كولەمى 600 تەڭگە، سپيرت تۇنباسىنا 2 جارىم مىڭ تەڭگە. ال ءبىزدىڭ نارىقتا رەسەي مەن بەلارۋستا وندىرىلگەن ءدال وسى دارىلەر الدەقايدا ارزانىراق. ويتكەنى بۇل مەملەكەتتەردە ناقتى وسى پرەپاراتتارعا اكسيز سالىعى جوق ەكەن. سوندىقتان تۇتىنۋشى البەتتە باسەكەلەستەر شىعارعان قولجەتىمدىسىن تاڭدايتىنىن ايتادى. سوندىقتان وتاندىق فارماسيەۆتتەر ءوندىرىس كولەمىن ازايتىپ، جۇمىس ورىندارىن دا قىسقارتۋىنا تۋرا كەلەدى دەيدى.
"دارىلىك زاتتار مەن مەديسينالىق ونىمدەردى وندىرۋدە قولدانىلاتىن ەتيل سپيرتىنە اكسيز سالىنادى. اكسيز سالۋ، قۇرامىندا الكوگول پايدالانىلاتىن ءونىم باعاسىنىڭ قاتتى وسۋىنە اكەپ سوعادى. بۇگىندە وسىنداي 130-عا جۋىق تاۋار بار. وتاندىق ونىمدەر وندىرىستە قولدانىلاتىن الكوگول مولشەرىنە بايلانىستى 30-دان 100 پايىزعا دەيىن قىمباتتاۋى مۇمكىن"، - دەيدى نازگۇل قابدىراحمانوۆا.