ۇكىمەت كەيبىر اعاش تۇرلەرىن ەلدەن شىعارۋعا التى اي مولشەرىندە تىيىم سالدى
بۇل تۋرالى پرەمەر-مينيستردىڭ ءبىرىنشى ورىنباسارى ءاليحان سمايىلوۆتىڭ باسشىلىعىمەن وتكەن سىرتقى ساۋدا ساياساتى جانە حالىقارالىق ەكونوميكالىق ۇيىمدارعا قاتىسۋ جونىندەگى ۆەدومستۆوارالىق كوميسسيانىڭ وتىرىسىندا ايتىلدى، دەپ حابارلايدى Almaty-akshamy.kz
«رەسەيلىك اعاشتىڭ رۇقساتسىز قايتا ەكسپورتتالۋىن بولدىرماۋ، وتاندىق كاسىپورىنداردى شيكىزاتپەن قامتاماسىز ەتۋ ءۇشىن قاي ەلدە شىعارىلعانىنا قاراماستان، كەيبىر اعاش تۇرلەرىن 6 ايعا دەيىن ەل اۋماعىنان اكەتۋگە تىيىم سالىندى»، - دەلىنگەن حابارلامادا.
سونداي-اق ەكسپورتقا ءموراتورييدى الىپ تاستاۋ تۋرالى شەشىم قابىلدانعانعا دەيىن ءار 6 اي سايىن شەكتەۋلەردى اۆتوماتتى تۇردە ۇزارتۋ تۋرالى ۇسىنىستى ماقۇلدادى.
كۇنباعىس تۇقىمى مەن كۇنباعىس مايىن شىعارۋعا كۆوتانى ۇلعايتۋ قاجەتتىگى مەن تابيعي ۋران، ونىڭ قوسىلىستارىنا ەكسپورتتىق كەدەندىك باج سالىعىن ەنگىزۋ ماسەلەلەرى تالقىلاندى. ءا.سمايىلوۆ تۇقىم وندىرۋشىلەردىڭ مۇددەلەرىن ەسكەرىپ، كۇنباعىس تۇقىمى مەن كۇنباعىس مايىن ەكسپورتتاۋعا كۆوتانىڭ ءتيىمدى كولەمىن انىقتاۋ جانە ءونىم باعاسىنىڭ وسۋىنە جول بەرمەۋ كەرەك ەكەنىن باسا ايتتى.