ءماجىلىس دەپۋتاتتارى ديپلوماتتار مەن اسكەريلەردىڭ ايەلدەرىنىڭ شەتەلدە تۇرعان كەزەڭىن جۇمىس ءوتىلى رەتىندە ەسەپتەۋدى ۇسىنعان بولاتىن.
بۇل باستاما شەتەلدە جۇمىس تابۋ قيىندىعىنا بايلانىستى قارجىلىق تاۋەلدىلىككە ۇشىرايتىن ايەلدەردى قولداۋعا باعىتتالعان، دەپ حابارلايدى aqshamnews.kz El.kz اقپارات اگەنتتىگىنە سىلتەمە جاساپ.
ۇكىمەتتىڭ مالىمەتىنشە، قولدانىستاعى الەۋمەتتىك كودەكسكە سايكەس، ديپلوماتتار مەن اسكەريلەردىڭ جۇبايلارى بەلگىلى ءبىر شارتتارعا ساي جۇمىس ءوتىلى رەتىندە ەسەپتەلەتىن مەرزىم ارقىلى زەينەتاقىمەن قامسىزداندىرىلادى. ەگەر ولار شەتەلدە جۇبايىمەن بىرگە تۇرسا نەمەسە كاسىبي قىزمەتىن جالعاستىرۋعا مۇمكىندىگى بولماسا، بۇل ۋاقىت ەڭبەك وتىلىنە قوسىلادى. سونىمەن قاتار، كوپبالالى انالار، مۇگەدەك بالاعا نەمەسە ەگدە جاستاعى ادامدارعا كۇتىم جاساعان ايەلدەر ءۇشىن دە وسىنداي جەڭىلدىكتەر قاراستىرىلعان.
بۇدان بولەك، بىرلەسكەن وتباسىلىق زەينەتاقى اننۋيتەتى ەنگىزىلىپ، ول ەرلى-زايىپتىلارعا زەينەتاقى جيناقتارىن بىرىكتىرۋگە مۇمكىندىك بەرەدى. وسىلايشا، ديپلوماتتار مەن اسكەريلەردىڭ ايەلدەرى جۇمىس ىستەمەسە دە، زەينەتكە شىعۋ مۇمكىندىگىنە يە بولادى.