الماتى اكىمى ەربولات دوسايەۆ باراحولكا بازارى بويىنا كولىكتەردىڭ بەيبەرەكەت توقتاۋىنا قاتىستى پىكىر ءبىلدىردى، دەپ حابارلايدى اlmaty-akshamy.kz Tengrinews.kz-كە سىلتەمە جاساپ.
جەتىسۋ اۋدانىنىڭ تۇرعىندارىمەن كەزدەسۋدە الماتىلىقتاردىڭ ءبىرى مەگاپوليس باسشىسىنا جۇگىندى. ول اقشانى ۇنەمدەۋ ماقساتىندا امبەباپ بازارلاردىڭ اقىلى تۇراعىنا كىرمەي، سولتۇستىك اينالما تاسجولى بويىنا توقتاپ، كولىكتەرىن قوياتىن جۇرگىزۋشىلەرگە شارا قولدانۋدى سۇرادى.
«سولتۇستىك اينالما جولدىڭ بويىندا جۇمابايەۆ كوشەسىنەن "كوكمايسا" ىقشاماۋدانىنا دەيىن ءتورت بازار ورنالاسقان: «كەنجەحان»، «قازىنا»، «ارلان» جانە «الاش». بىلتىر بۇل تاسجولعا جوندەۋ جۇمىستارى جۇرگىزىلىپ، بورديۋرلەر ورناتىلدى. ءبىراق ءقازىر جۇرگىزۋشىلەر ءبىرىنشى جولاقتان تۇراق جاساپ العان: 200 تەڭگە ۇنەمدەيدى، بازاردىڭ تۇراعىنا كىرمەيدى. وسىعان بايلانىستى بۇل كوشەدە ۇنەمى كەپتەلىستەر بولادى»، - دەپ اشۋلاندى ەر ادام.
بۇعان جاۋاپ رەتىندە ەربولات دوسايەۆ پوليسيا مەن سيفرلاندىرۋ قىزمەتكەرلەرىنە ەرتەڭنەن باستاپ شارا قولدانۋدى تاپسىردى. اتاپ ايتقاندا، پوليسەيلەر بەلگىلەنگەن اۋماقتى تاڭەرتەڭ جانە كەشكە تەكسەرىپ، اكىمدىك قىزمەتكەرلەرى ول جەرگە "سەرگەك" كامەرالارىن ورناتۋى كەرەك.
«ارىستانعاني راسىلحان ۇلى (زاپپاروۆ - الماتى پوليسيا دەپارتامەنتىنىڭ باستىعى - ەسك.)، بولەيىك. مەن ءقازىر تاپسىرما بەرەمىن، كورسەتىلگەن اۋماققا ءبىر «سەرگەك» كامەرا كەشەنىن ورناتىڭىز. تاكسي جۇرگىزۋشىلەرى ول جەردە اۆتوتۇراق جاساپ السا، ەندى ازداعان ايىپپۇل تولەسىن.
اقشا بار دەپ ويلايمىن، الداعى ەكى ايدا كامەرالار ورناتامىز. سونداي-اق، تاكسي جۇرگىزۋشىلەرىمەن جۇمىس جۇرگىزىڭىزدەر. جەرگىلىكتى پوليسيا قىزمەتى نەگە جۇمىس ىستەمەيدى؟ تاڭەرتەڭ جانە كەشكە ءبىر پاترۋل كولىگىن سوندا قويىڭىزدار. ءبارىبىر قالانى ارالاپ جۇرەدى، ايىرماشىلىعى نەدە؟ ەرتەڭنەن باستاپ پاترۋل قويىڭىز، «سەرگەك» ورناتىلعاننان كەيىن ءپاترۋلدى الىپ تاستاۋعا بولادى»، - دەدى الماتى اكىمى.