قاتار ەلى قورشاعان ورتانى قورعاۋعا ارنالعان تەحنولوگيالارعا دەن قويدى. ءقازىر وندا فۋتبولدان الەم چەمپوناتىنا قىزۋ دايىندىق ءجۇرىپ جاتىر. تەڭبىل دوپتىڭ باستى دوداسى وتەتىن ستاديون قۇرىلىسى جان-جاقتى ويلاستىرىلعان. اتاپ ايتقاندا، كومىرتەگىن بەيتاراپتاندىرۋ جۇيەسىنىڭ كومەگىمەن ەنەرگيانى ۇنەمدەيتىن قۇرىلعىلار ورناتىلماق. بۇل تۋرالى Almaty-akshamy.kz 24.kz-كە سىلتەمە جاساپ حابارلايدى.
دۇنيە ءجۇزى كوز تىگەتىن الا دوپتىڭ الامانى بيىل قاتار ەلىندە وتەتىنى بەلگىلى. قاراشاعا بەلگىلەنگەن الەم چەمپوناتىنا دايىندىق قىزۋ ءجۇرىپ جاتىر. ۇيىمداستىرۋشىلار اۋقىمدى ءىس-شارا كەزىندەگى ادامداردىڭ قاۋىپسىزدىگىمەن قاتار قورشاعان ورتانى قورعاۋدى ويلاستىرىپ قويعان. اتاپ ايتقاندا، كومىرتەگىنىڭ از ءبولىنۋىن قامتاماسىز ەتۋ ماقساتىندا ەنەرگيانى از تۇتىنىپ، قايتا وڭدەۋدى قولعا الماق. ستاديون قۇرىلىسىندا وسى قاعيدا نەگىزگە الىنعان.
ءالبارا ك. ابۋكەشەك، «لۋسايل» ستاديونى ديرەكتورىنىڭ ورىنباسارى:
- ستاديون سالۋ كەزىندە ونىڭ جەرتولەسىن بيىكتەتىپ قويدىق. بۇل ينجەنەرلىك تۇرعىدان وڭتايلى شەشىم. وچسىلايشا نىسان كوپ ەنەرگيانى قاجەت ەتپەيدى. سونداي-اق قوقىستى قايتا وڭدەۋ جۇيەسى دە ويلاستىرىلعان. قولدانىلعان سۋدىڭ بولەك سۋاعارعا تۇسەدى دە عيماراتتى تازالاۋ مەن كارىز جۇيەسىنىڭ قىزمەتىنە قولدانىلادى.
ستاديوندار الىنبالى مودۋلدەردەن سالىنباق. الەم چەمپيوناتى وتكەن سوڭ مودۋلدەر الىنىپ، نىسانداردىڭ الىپ جاتقان كەڭىستىگى دۇكەن مەن قوناقۇيلەردىڭ كادەسىنە جاراتىلادى. ال ءال-دجانۋب الاڭى الەمدەگى العاشقى كوشپەلى جاسىل ستاديون اتاۋىنا يە بولماق.
ۋيليامس كامپو، «ءال-دجانۋب» ستاديونىنىڭ ۇيلەستىرۋشى مەنەدجەرى:
- ءال-دجانۋب ستاديونى 40 مىڭ ورىنعا لايىقتالىپ سالىندى. الەم چەمپيوناتىنان كەيىن دەمونتاج جاساپ قايتا جيناپ الامىز. ۇستىڭگى ورىندار سانى 20 مىڭعا دەيىن قىسقارادى. كەيىن الىنبالى ورىندىقتاردى مۇقتاج ەلدەرگە تابىستايمىز.
قالاداعى كولىك قاتىناسىنا قاتىستى جەرگىلىكتى بيلىكتىڭ ءوز جوسپارى بار. تۋريستەر اعىلعان تۇستا تۇرعىنداردى مەيلىنشە قوعامدىق كولىكپەن جۇرۋگە ۇگىتتەپ جاتىر. ستاديوننىڭ قاسىندا فۋتبولشىلار مەن جانكۇيەرلەردى تاسيتىن 700 ەلەكترواۆتوبۋستار تۇراعى سالىندى. قاتارداعى تەڭبىل دوپتىڭ باس بايگەسى قاراشانىڭ 20-سىندا باستالاتىنىن ەسكە سالا كەتەيىك. وسىلايشا بۇل چەمپيونات ەكولوگيا ماسەلەسىنە دەن قويعان اۋقىمدى ءىس-شارا رەتىندە فۋتبول تاريحىنا ەنبەك.