وسىعان دەيىن كاتار قازاقستانعا 50 ملن دوللار ينۆەستيسيالاعان.
ۆيسە-پرەمەر - ساۋدا جانە ينتەگراسيا ءمينيسترى سەرىك ءجۇمانعاريننىڭ ايتۋىنشا، بۇگىن كاتار مەن قازاقستان اراسىندا ەكى ماڭىزدى قۇجاتقا قول قويىلادى، دەپ حابارلايدى Almaty-akshamy.kz
ونىڭ ءبىرى - ساۋدا-ەكونوميكالىق ىنتىماقتاستىق تۋرالى نەگىزدەمەلىك كەلىسىم. ەكىنشىسى - ستاندارتتاۋ مەن مەترولوگيا سالاسىنداعى كەلىسىم.
«كوبىسى تۇسىنە بەرمەيدى، ءبىراق ءبىزدىڭ تاۋارلاردىڭ نارىقتا تانىلۋى تۇرعىسىنان بۇل - وتە ماڭىزدى كەلىسىمشارت. قوي ەتىن، مۇزداتىلعان ەت جەتكىزۋ، قازاقستان اۋماعىندا ءسۇت باعىتىندا سيىر ءوسىرۋ بويىنشا ۋاعداستىلىققا قول جەتكىزىلدى»، - دەدى جۇمانعارين.
سونىمەن قاتار، ونىڭ ايتۋىنشا، قارجى سالاسىندا دا ۇلكەن جۇمىس اتقارىلىپ جاتىر.
«كاتاردىڭ بەلگىلى بانكى وسى جەردە بانك اشۋدى جوسپارلاپ وتىر. احقو بيرجاسىندا ءقازىر ءتۇرلى كاتارلىق ينستيتۋتتار تىركەلۋدە»، - دەدى ۆيسە-پرەمەر.
جۇمانعارين كاتار وسىعان دەيىن قازاقستانعا 50 ملن دوللار ينۆەستيسيالاعانىن اتاپ ءوتتى. سونىڭ ىشىندە قايىرىمدىلىق تا بار، الماتىدا مەديسينالىق مەكەمە سالدى.
«ساۋدا اينالىمى 3 ملن دوللار شاماسىندا. بۇل تومەن كورسەتكىش ەكەنىن مويىنداۋ كەرەك. ءقازىر تەتىكتەر مەن قۇرالداردى جاقسارتىپ جاتىرمىز. ساۋدا الەۋەتى 70 ملن دوللاردى قۇرايدى»، -دەدى جۇمانعارين.
كاتار ءامىرى شەيح ءتاميم بەن حاماد ءال ءتاني استاناعا مەملەكەتتىك ساپارمەن كەلدى. اقوردادا سالتاناتتى تۇردە قارسى الۋ ءراسىمى ءوتتى.