كاسپيي تەڭىزىنىڭ تابانى ارقىلى بايلانىس جەلىسى سالىنادى

قاسىم-جومارت توقايەۆقا «قازاقتەلەكوم» كومپانيالار توبىنىڭ بىلتىرعى اتقارعان جۇمىستارىنىڭ ناتيجەسى تۋرالى ەسەپ بەرىلىپ، الداعى كەزەڭگە ارنالعان جوسپارى تانىستىرىلدى.

پرەزيدەنتكە 2025 جىلدىڭ سوڭىنا قاراي 5G جەلىسىن جەدەل ەنگىزۋ جونىندەگى تاپسىرماسىنىڭ ورىندالۋ بارىسى تۋرالى دا باياندالدى.

قۋانىشبەك ەسەكەيەۆتىڭ ايتۋىنشا، 7 مىڭنان استام بازالىق ستانسيا سالۋ جوسپارى ازىرلەنگەن. «قازاقتەلەكوم» – تمد كەڭىستىگىندە 5G تەحنولوگياسىن ىسكە قوسقان العاشقى جانە جالعىز كومپانيا.

بۇدان بولەك، مەملەكەت باسشىسىنا قىزمەت ساپاسىن جاقسارتۋ جۇمىستارى جونىندە مالىمەت بەرىلدى. بيىل كومپانيانىڭ 63 مىڭ ابونەنتىنىڭ ەسكىرگەن مىس جەلىسىن زاماناۋي وپتيكالىق جەلىگە اۋىستىرۋ جوسپارلانعان. سونداي-اق 50 مىڭ تۇتىنۋشى مودەمىنىڭ تەحنولوگيالىق جابدىقتارى جاڭارتىلادى.

سونىمەن قاتار پرەزيدەنتكە قازاقستان مەن ازەربايجان اراسىندا كاسپيي تەڭىزىنىڭ تابانى ارقىلى ترانسكاسپيي تالشىقتى-وپتيكالىق بايلانىس جەلىسىن سالۋ جوباسىنىڭ ىسكە اسىرىلۋ بارىسى تانىستىرىلدى. بۇل جوبا قازاقستاننىڭ اسا ماڭىزدى وڭىرلىك تەلەكوممۋنيكاسيالىق حابقا اينالۋىنا، ەل اۋماعىنان وتەتىن حالىقارالىق ترافيك ءترانزيتىن ۇلعايتۋعا مۇمكىندىك بەرەدى.

كەزدەسۋ بارىسىندا قاسىم-جومارت توقايەۆ ەكونوميكالىق جانە الەۋمەتتىك سالالاردى سيفرلاندىرۋ وتە ماڭىزدى ەكەنىن اتاپ ءوتتى. سەبەبى ءقازىر جاڭا تەلەكوممۋنيكاسيالىق تەحنولوگيالاردىڭ مۇمكىندىكتەرى ەلدىڭ حالىقارالىق ارەناداعى باسەكەگە قابىلەتتىلىك دەڭگەيىن ايقىندايدى.

مەملەكەت باسشىسى قازاقستان ازاماتتارىن زاماناۋي تەلەكوممۋنيكاسيا قىزمەتتەرىمەن قامتاماسىز ەتۋ قاجەتتىگىنە دە نازار اۋدارىپ، كومپانيانىڭ بارلىق ينۆەستيسيالىق جوباسىن ۋاقىتىلى ىسكە اسىرۋدى تاپسىردى.