اتالعان جوبا جاھاندىق ەكولوگيالىق قوردىڭ گرانتتىق قاراجاتى ەسەبىنەن قارجىلاندىرىلادى.
بۇل جوبا ءۇش كاسپيي ماڭى ەلدەرى - ءازىربايجان، قازاقستان، تۇرىكمەنستاندا جۇزەگە اسىرىلادى دەپ جوسپارلانىپ وتىر، دەپ حابارلايدى aqshamnews.kz.
جالپى بيۋدجەتى شامامەن 12 ملن اقش دوللارىن قۇرايدى. جوبا 2025 جىلدىڭ ەكىنشى جارتىسىندا ىسكە قوسىلادى دەپ كۇتىلۋدە.
قازاقستان رەسپۋبليكاسىنىڭ ەكولوگيا جانە تابيعي رەسۋرستار مينيسترلىگى، دۇنيەجۇزىلىك بانك جانە بۇۇ جوبالاردى باسقارۋ باسقارماسى (UNOPS) وكىلدەرى اراسىندا «كاسپيي تەڭىزىنىڭ ەكوجۇيەسىن قالپىنا كەلتىرۋ: لاستانۋدى باسقارۋ جانە بيوارتۇرلىلىكتى ساقتاۋ الەۋەتىن ارتتىرۋ» («Blueing the Caspian Sea: Building Capacities for Pollution Management and Biodiversity Conservation») جوباسىنىڭ ۇلتتىق كومپونەنتتەرىن بەكىتۋ بويىنشا ونلاين كەزدەسۋ ءوتتى.
كەزدەسۋگە قازاقستان تاراپىنان قازاقستان رەسپۋبليكاسى اۋىل شارۋاشىلىعى مينيسترلىگى بالىق شارۋاشىلىعى كوميتەتىنىڭ، «قازگيدرومەت» رمك جانە حالىقارالىق سۋ رەسۋرستارىن باعالاۋ ورتالىعىنىڭ وكىلدەرى قاتىستى.
كەزدەسۋ بارىسىندا قاتىسۋشىلار جوبانىڭ ۇلتتىق كومپونەنتتەرىن، كورسەتكىشتەرىن جانە كۇتىلەتىن ناتيجەلەردى باعالاۋ ادىستەرىن ەگجەي-تەگجەيلى تالقىلادى. قازاقستان تاراپى كاسپيي تەڭىزىنىڭ ەكولوگيالىق جانە گيدرولوگيالىق مونيتورينگ جۇيەلەرىن جەتىلدىرۋدىڭ، كاسپيي ماڭى ەلدەرى اراسىنداعى عىلىمي-زەرتتەۋ قىزمەتىن دامىتۋدىڭ، سونداي-اق كاسپيي يتبالىعى پوپۋلياسياسىن ساقتاۋ بويىنشا بىرلەسكەن جۇمىستار جۇرگىزۋدىڭ ماڭىزدىلىعىن اتاپ ءوتتى.