سۋ رەسۋرستارى جانە يرريگاسيا مينيسترلىگى كاسپيي تەڭىزىنە 1 ملرد تەكشە مەترگە جۋىق سۋ جىبەردى.
تاسقىن سۋى 4 ارنا: باقساي، نارىن، چەرنايا رەچكا جانە سوكولوك ارقىلى ءوتتى، دەپ حابارلايدى Almaty-akshamy.kz سۋ مينيسترلىگىنە سىلتەمە جاساپ.
جالپى، بۇل ارنالار تاۋلىگىنە 12 ميلليون تەكشە مەترگە دەيىن سۋ وتكىزە الادى. ولاردىڭ ءارقايسىسىندا سۋ رەسۋرستارى جانە يرريگاسيا مينيسترلىگىنىڭ «قازسۋشار» مەكەمەسىنىڭ ماماندارى تازارتۋ، نىعايتۋ جانە باسقا دا جۇمىستار جۇرگىزدى. مىسالى، سوكولوك كانالىنىڭ بويىندا ۇزىندىعى 14،5 شاقىرىم قوسىمشا ارنا قازىلدى، ول ارقىلى تاسقىن سۋى كاسپييگە جىبەرىلەدى.
«سونداي-اق ءبىز جايىق وزەنى ارقىلى سۋدى ليماندارعا باعىتتايمىز. ال، ويىل وزەنىنەن سۋ ليمانداردان بولەك، جەراستى سۋلارىنىڭ ورىندارىن تولتىرۋ ءۇشىن دە جىبەرىلەدى. وسىعان دەيىن ءبىز بالقاش كولىنە سۋ جىبەرىپ، ونىڭ دەڭگەيىن 15 سم-گە كوتەردىك، بقو قامىس-سامار كولدەرىنە، ۇلىتاۋدان قىزىلوردا وبلىسىنىڭ كولدەرىنە سۋ جىبەردىك، اقمولا وبلىسىنىڭ كولدەرىن تولتىردىق. ءبىزدىڭ الدىمىزداعى ءبىرىنشى كەزەكتەگى مىندەتتەردىڭ ءبىرى - كولدەردى تاسقىن سۋمەن تولتىرۋ»، - دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.