ۇكىمەت ءتيىستى قاۋلى قابىلدادى.
قازاقستاندا كاسىپتىك ءبىلىمى جوق جانە جۇمىسسىز جۇرگەن جاستاردى جۇمىسقا ورنالاستىرۋ بويىنشا بەلسەندى كومەك كورسەتىلىپ، وزگە دە قولداۋ شارالارى قولعا الىنادى، دەپ حابارلايدى Almaty-akshamy.kz
قۇجات "ءبىلىمى جوق جانە جۇمىسسىز" جاستارمەن (NEET ساناتى) ناقتى جۇمىس جۇرگىزەتىن ءبىرقاتار ورتالىق مەملەكەتتىك ورگاننىڭ قۇزىرەتىن ايقىندايدى. وسىلايشا، ەڭبەك جانە حالىقتى الەۋمەتتىك قورعاۋ مينيسترلىگىنە ۋاقىتشا جۇمىسسىز قالعان جاستاردىڭ جۇمىسقا ورنالاسۋىنا كومەكتەسۋ، سونداي-اق جاستاردى جۇمىسپەن قامتۋ بويىنشا مەملەكەتتىك-الەۋمەتتىك تاپسىرىستىڭ ورىندالۋىن باقىلاۋ جۇكتەلدى. ال مادەنيەت جانە سپورت مينيسترلىگى جاستاردىڭ بوس ۋاقىتىن ۇيىمداستىرۋعا باعىتتالعان مادەني جانە ت. ب. ءىس-شارالار كەشەنىن جۇزەگە اسىرادى.
بۇدان بولەك، قاۋلىدا جاستارمەن جۇمىس جاسايتىن مامانداردىڭ بىلىكتىلىك سيپاتتاماسىن، جاستار ەڭبەك جاساقتارىن قۇرۋ ەرەجەلەرىن، سونداي-اق جاستاردى دامىتۋ يندەكسىن ەنگىزۋ قاعيدالارىن بەكىتۋگە مۇمكىندىكتەر جاسالعان.