جۇمىس ورىندارىندا ۆيرۋستىڭ تارالۋىن توقتاتۋ جانە جۇمىسكەرلەردىڭ قورعالۋىن قامتاماسىز ەتۋ قاجەت.
كاسىپوداقتار فەدەراسياسى كاسىپوداق ۇيىمدارىنا، جۇمىسكەرلەرگە جانە جۇمىس بەرۋشىلەرگە كوروناۆيرۋس ينفەكسياسىنا قارسى ۆاكسيناسيا ماسەلەسى بويىنشا ۇندەۋ جولدادى، دەپ حابارلايدى Almaty-akshamy.kz.
كاسىپوداقتار فەدەراسياسىنىڭ ۇندەۋىندە كۇللى الەمدە، سونىڭ ىشىندە ءبىزدىڭ ەلىمىزدە دە كوروناۆيرۋس ينفەكسياسىنىڭ كەسىرىنەن داعدارىس بولعانى ايتىلعان. سونىمەن قاتار قۇجاتتا پاندەميا ەڭبەك نارىعىنا كەرى ىقپال ەتىپ، تولىق ەمەس جۇمىسپەن قامتۋدىڭ ارتۋىنا جانە ەكونوميكالىق بەلسەندىلىكتىڭ تومەندەۋىنە، كاسىپورىنداردىڭ جابىلۋىنا، ەڭبەك تابىسىنىڭ ازايۋىنا، ەڭبەك قاۋىپسىزدىگى جانە ەڭبەك قۇقىقتارى سالاسىندا جاڭا سىن-تەگەۋرىندەرگە الىپ كەلگەنى تۋرالى ايتىلعان.
«وسى جاعدايدا كاسىپوداقتار مەن جۇمىس بەرۋشىلەردىڭ الدىندا تۇرعان ماڭىزدى مىندەت – وندىرىستىك الەۋەتتى ساقتاپ قالۋ. جۇمىس ورىندارىندا ۆيرۋستىڭ تارالۋىن توقتاتۋ جانە جۇمىسكەرلەردىڭ قورعالۋىن قامتاماسىز ەتۋ قاجەت. بۇل ماسەلەدە ەل تۇرعىندارىن ۆاكسيناسيالاۋ ماڭىزدى قۇرال بولىپ تابىلادى. ۆاكسيناسيا – بۇل پاندەميانى توقتاتۋدىڭ، ءقاۋىپسىز ەڭبەك جاعدايلارىن قامتاماسىز ەتۋدىڭ، جۇمىسشىلار مەن ولاردىڭ وتباسىلارىنىڭ دەنساۋلىعىن قورعاۋدىڭ جالعىز جولى»، – دەلىنگەن ۇندەۋدە.
ەلدە ۆاكسيناسيا العىسى كەلەتىندەردىڭ بارلىعىنا اقىسىز ۆاكسيناسيا الۋعا جانە اۋىر ىندەتتىڭ تارالۋىنا جول بەرمەۋگە جاعداي جاسالعان.
«ءبىز جۇمىسكەرلەردى ءوز دەنساۋلىعى مەن جاقىندارىنىڭ دەنساۋلىعىنا قامقورلىق تانىتىپ، ءقاۋىپسىز جاعدايدا جۇمىس ىستەۋ ءۇشىن COVID-19 قارسى ۆاكسينا الۋعا شاقىرامىز»،– دەپ جازىلعان قۇجاتتا.