بۇل تۋرالى باس پروكۋرور بەرىك اسىلوۆ مالىمدەدى.
بۇل جايىندا ول ءماجىلىس دەپۋتاتتارىنىڭ ينۆەستيسيالاردى قورعاۋ تۋرالى ساۋالىنا جولداعان جاۋابىندا ايتتى، دەپ حابارلايدى Almaty-akshamy.kz
التى مينيسترلىك ەكى مىڭ كاسىپكەردى زاڭسىز تەكسەرمەك بولعان.
«كاسىپكەرلىك سۋبەكتىلەرىنىڭ مۇددەسى ءۇشىن پروكۋرورلار جىل باسىنان بەرى 5 مىڭنان استام تىيىم سالۋ جانە شەكتەۋ شارالارىنىڭ، 560 ملن تەڭگەدەن استام سوماعا 2 مىڭ زاڭسىز اكىمشىلىك ءىس جۇرگىزۋدىڭ كۇشىن جويدى. باس پروكۋراتۋرانىڭ نارازىلىقتارى بويىنشا مينيسترلىكتەردىڭ (دەنساۋلىق ساقتاۋ، اۋىل شارۋاشىلىعى، ەكولوگيا، قارجى، يندۋستريا جانە ينفراقۇرىلىمدىق دامۋ) 2 مىڭ بيزنەس سۋبەكتىسىنە زاڭسىز تەكسەرۋ (بارۋ ارقىلى پروفيلاكتيكالىق باقىلاۋ) جۇرگىزۋدى كوزدەگەن 9 بۇيرىعىنىڭ كۇشى جويىلدى (وزگەرتىلدى)»، - دەيدى بەرىك اسىلوۆ.
پروكۋراتۋرا ورگاندارىنىڭ بيزنەستى قورعاۋ جونىندەگى ءموبيلدى توپتارى وتكەن ءتورت ايدا كاسىپكەرلەردەن تۇسكەن 1100 شاعىمدى تەكسەرگەن.
«تۇسكەن سيگنالداردىڭ ءاربىر بەسىنشىسى (219) راستالدى. «اتامەكەن» ۇكپ-مەن جانە بيزنەس-ومبۋدسمەنمەن تىعىز ىنتىماقتاستىق ورناتىلدى.
پروكۋرورلاردىڭ كومەگىمەن بيزنەس سۋبەكتىلەرى ءۇشىن وزەكتى بولىپ تابىلاتىن 12 ماسەلە شەشىمىن تاپتى (كاسىپكەرلەرگە گازدى جوعارى باعامەن ساتۋ، زاڭسىز مونيتورينگتەر جۇرگىزۋ، جك-گە قاتىستى سالىق بۇيرىقتارىن شىعارۋ پراكتيكاسى توقتاتىلدى، بولشەك ساۋدا ءۇشىن ورىندار انىقتالدى جانە ت.ب.). بيزنەس قۇقىقتارىن بۇزۋ بويىنشا بارلىعى 750 قاداعالاۋ اكتىسى ەنگىزىلدى، 360 لاۋازىمدى ادام جاۋاپتىلىققا تارتىلدى»، - دەلىنگەن جاۋاپتا.