پروسەدۋرالاردى سيفرلىق فورماتقا كوشىرۋ كوزدەلگەن
وتكەن اپتادا قازاقستان ساۋداسىن جەڭىلدەتۋ جونىندەگى ۇلتتىق اقپاراتتىق پورتالى ىسكە قوسىلدى. بۇل تۋرالى ساۋدا جانە ينتەگراسيا ءمينيسترى باقىت سۇلتانوۆ الەۋمەتتىك جەلىدە جازدى، دەپ حابارلايدى Almaty-akshamy.kz.
«Tradeinfo.kz - ساۋدا پورتالى ەكسپورتتاۋشىلار مەن يمپورتتاۋشىلار ءۇشىن بارلىق ساۋدا پروسەدۋرالارىنا ارنالعان نۇسقاۋلىق بولىپ تابىلادى. ءبىز ءارتۇرلى تاۋار تۇرلەرىن يمپورتتاۋعا، ەكسپورتتاۋعا جانە ترانزيتتەۋگە قولدانىلاتىن بارلىق قادامدىق ەرەجەلەر مەن راسىمدەردى ءبىر جەردە جينادىق (تاۋارلار سانى بىرتىندەپ ارتىپ وتىرادى). ءبىزدىڭ مىندەتىمىز - سىرتقى ساۋدا قاتىسۋشىسىنىڭ قىزمەت تۇرىنە قاراماستان تالاپ ەتىلەتىن راسىمدەر، قۇجاتتاردىڭ تۇرلەرى تۋرالى اقپارات، قۇجاتتاردى تولتىرۋ ءتارتىبى جانە ت.ب. قاجەتتى اقپاراتتى ءبىر جەردەن الاتىنداي مۇمكىندىك جاساۋ»، – دەپ جازدى باقىت سۇلتانوۆ.
ءمينيستردىڭ ايتۋىنشا، نەگىزگى مىندەت ترانسشەكارالىق ساۋدانى بارىنشا جەڭىلدەتۋ جانە پروسەدۋرالاردى سيفرلىق فورماتقا كوشىرۋ. بۇل بارلىق قاتىسۋشىلار ءۇشىن ىڭعايلى، بۇكىل پروسەستى ايتارلىقتاي جىلدامداتادى، ءبارى اشىق جانە وڭاي باسقارىلادى.
«ءبىز باسقا ورگاندارداعى ارىپتەستەرىمىزبەن بىرگە كەيبىر قايتالاناتىن تالاپتاردى جويۋ جانە جەكەلەگەن تالاپتاردى قىسقارتۋ بويىنشا جۇمىس جۇرگىزىپ جاتىرمىز. ساۋدا پورتالىمەن پروسەسس جىلدام جۇرەتىنىنە سەنىمدىمىن - ءبىز پورتالدى كاسىپكەرلەرمەن ينتەگراتيۆتى كەرى بايلانىس قۇرالى رەتىندە قاراستىرامىز جانە بيزنەس قاۋىمداستىقتارمەن جانە ۋاكىلەتتى ورگاندارمەن ساۋدا راسىمدەرىن جەڭىلدەتۋ بويىنشا بارلىق يدەيالاردى پىسىقتايمىز. سايىپ كەلگەندە، ماقسات كەدەندىك ينفراقۇرىلىمدى جاڭعىرتۋ، ترانسشەكارالىق وپەراسيالاردى وڭتايلاندىرۋ، ساۋدا فورمالدىلىقتارىن وڭايلاتۋ، ۇيلەستىرۋ جانە اۆتوماتتاندىرۋ جونىندەگى كەشەندى شارالار بولۋعا ءتيىس. وسى ماسەلەلەردىڭ بارلىعىن ءبىز ق ر ۇكىمەتى جانىنداعى ساۋدا راسىمدەرىن جەڭىلدەتۋ جونىندەگى ۇلتتىق كوميتەتتىڭ قىزمەتى شەڭبەرىندە كوتەرەتىن بولامىز»، – دەدى مينيستر.
ساۋدا پورتالى بويىنشا جۇمىس 2020 جىلدان بەرى جۇرگىزىلىپ كەلەدى.
«بىزگە ەۋروپالىق وداقتىڭ قولداۋىمەن حالىقارالىق ساۋدا ورتالىعى جۇزەگە اسىرىپ جاتقان "Ready4Trade - ورتالىق ازيا" جوباسى ۇلكەن كومەك كورسەتتى. حالىقارالىق جانە ۇلتتىق كونسۋلتانتتاردىڭ، ونىڭ ىشىندە "Ready4trade - ورتالىق ازيا" جوباسىنىڭ باس سەرىكتەسى - ءبىزدىڭ "QazTrade" كومپانياسى قىزمەتكەرلەرىنىڭ ەكى جىلدىق كوماندالىق جۇمىسىنىڭ جەمىسى. مەن بارلىق كاسىپكەرلەردى پورتالدىڭ اقپاراتتىق مۇمكىندىكتەرىن پايدالانۋعا شاقىرامىن»، – دەدى ساۋدا جانە ينتەگراسيا ءمينيسترى باقىت سۇلتانوۆ.